Քաղաքական ընդդիմախոսներին վախեցնելու քաղաքական ռեպրեսիաների ձև է. Արսեն Բաբայանը՝ Նարեկ Մալյանին բերման ենթարկելու մասին

ԵՐԵՎԱՆ, 28 ՀՈՒՆՎԱՐԻ, Aysor.am: Տեղեկություններ ունենք, որ Նարեկ Մալյանը 6-րդ վարչությունում է գտնվում, լրագրողների հետ զրույցում ասաց իրավապաշտպան Արսեն Բաբայանն՝ ընդգծելով.

«Անհայտ պատճառներով դիմակավորված անձինք կոպիտ վարվելով մարդուն բերման են ենթարկում, կարելի է ասել՝ առևանգում են», – ասաց Բաբայանը:

Վերջինս նշեց, որ առհասարակ դիմակավոր անձինք ձեռնաշղթաներով մարդուն բերման են ենթարկում, երբ հանցագործություն է կատարվում այդ պահին կամ հանցագործությունից անմիջապես հետո, մինչդեռ Բաբայանի խոսքով, ըստ հրապարակված տեսանյութի, երևում է, որ հանցագործություն տեղի չի ունեցել.

«Քաղաքական ընդդիմախոսներին վախեցնելու քաղաքական ռեպրեսիաների ձև է: Ցանկացած դեպքում, երբ քննադատում եք ձեզ կպառկեցնեն ասֆալտին, դիմակավոր անձինք ձեռնաշղթաներով բերման կենթարկեն 6-րդ վարչություն, ընդ որում, չեք էլ կարողանա իմանալ՝ ինչի համար», – ասաց Բաբայանը՝ նշելով, որ սա քաղաքական ընդդիմախոսությունը չհանդուրժելու մասին է փաստում:

Ավելի վաղ քաղաքական վերլուծաբան Միհրան Հակոբյանը ֆեյսբուքյան իր էջում տեսանյութ է հրապարակել, որում երևում է, որ ՎԵՏՕ նախաձեռնության հիմնադիր Նարեկ Մալյանին բերման են ենթարկում դիմակավորված անձինք: