«168 ժամ»․Նիկոլ Փաշինյանի մարտահրավերը հպարտ քաղաքացիներին

«168 ժամ»․Նիկոլ Փաշինյանի մարտահրավերը հպարտ քաղաքացիներին

Սահմանադրության մեջ փոփոխություններ կատարելու հարցը հանրաքվեի ներկայացնելու՝ խորհրդարանի նախօրեին կայացրած որոշումը, ինչպես նաև՝ այդ հարցի նպատակով հրավիրված նիստում վարչապետ Նիկոլ Փաշինյանի ելույթը, կանխորոշելու են առաջիկա երկու-երեք ամիսների Հայաստանի ապագան։ Մռայլ ապագան։ «Շնաբարո» ապագան ու «վնգստացող» ապագան։

Բացի այն, որ սահմանադրական հանրաքվեն խնդրահարույց ու վիճահարույց է իրավականության ու սահմանադրականության տեսանկյունից, այն դառնալու է քաղաքական բախումների, ներքին թշնամիների հայտարարման ու դրանց դեմ պայքարի՝ քաղաքական ու բարոյական սթրեսներով լի գործընթաց։ Դրա մեկնարկը տվեց Նիկոլ Փաշինյանը՝ Ազգային ժողովում ունեցած իր ելույթով։ Քաղաքական ու ոչ միայն քաղաքական ախտորոշման վկայություն հանդիսացող ելույթով։

Ահա այդ ելույթով սկիզբ դրված գործընթացն ուղեկցվելու է հիստերիայով ու հայհոյախոսությամբ, ատելության ու թշնամանքի անթույլատրելի չափաբաժնով։ Լինելու են մարդկանց՝ «պետության թշնամիներ» ու «ազգի նվիրյալներ» հայտարարելու դիտարժան տեսարաններ, ցանկացած այլակարծություն ներկայացվելու է՝ որպես «ժողովրդի դեմ ուղղված» քայլ։ Ու ամեն ինչ, բնականաբար, արվելու է ժողովրդի անունից, հանուն ու ի շահ ժողովրդի։

Ի դեպ, ևս մեկ ախտորոշման նյութ է Նիկոլ Փաշինյանի կողմից իրեն ու իր քաղաքական թիմին ժողովրդի հետ նույնացնելու քայլը։ Պարզունակ այդ տեխնոլոգիայի հիմքում ընկած է այն հաշվարկը, որ իր և իշխանության դեմ ուղղված ցանկացած քննադատություն ներկայացվելու է՝ որպես ժողովրդի դեմ ուղղված քայլ։ Ժողովուրդը, բնականաբար, որևէ դատական ատյանում իրեն ուղղված այդ վիրավորանքի համար պատիվ պահանջելու հնարավորություն չունի։ Ինչպես որ չկա որևէ ատյան, որտեղ հնարավոր կլինի բողոքարկել Նիկոլ Փաշինյանի կողմից հռչակած «սիրո և հանդուրժողականության» կարգախոսի գործնական վերածումը «ատելության և թշնամանքի» իրողության։

Հասարակությունը ևս մի քանի ամիս ապրելու է այդ ատելության խտացված մթնոլորտում՝ հանուն այն բանի, որ Նիկոլ Փաշինյանն իրագործի իր հերթական ցանկություններից մեկը։ Հանուն ժողովրդի, բնականաբար։ Արդեն իսկ հնչել են բազմաթիվ գնահատականներ այն մասին, որ Սահմանադրական փոփոխությունների հանրաքվեն դառնալու է Նիկոլ Փաշինյանի վստահության հանրաքվեն։ Գուցե։

Բայց այդ նույն հանրաքվեն նաև եզակի հնարավորություն է դառնալու հասարակության համար՝ ապացուցելու կամ ժխտելու այն պարզունակ բանաձևը, որ յուրաքանչյուր ժողովուրդ արժանի է իր իշխանությանը։

Մանրամասները՝ թերթի այսօրվա համարում։

 

Հետևեք մեզ նաև Telegram-ում