Սուլեյմանիի սպանության համար Վաշինգտոնին տրված պատասխանը դեռևս չի ավարտվել. Իրան
Նմանատիպ
ԵՐԵՎԱՆ, 18 ՄԱՐՏԻ, Tert.am: Իրանի նախագահ Հասան Ռոհանին հայտարարել է, որ Թեհրանը Վաշինգտոնին պատասխանել է Իսլամական հեղափոխության պահապանների կորպուսի գեներալ Ղասեմ Սոլեյմանիի սպանության համար, սակայն այդ ամենով պատասխանը դեռևս ավարտված չէ: Այս մասին տեղեկացնում է РИА Новости գործակալությունը:
Իրանի նախագահի խոսքերը հնչել են Իրաքում տեղակայված Թաջի ռազմակայանի հրթիռակոծման ֆոնին, որի հետևանքով մահացել և վիրավորվել է ԱՄՆ-ի մի քանի զինծառայող:
Վաշինգտոնում հրթիռակոծման պատասխանատվությունը դրել են իրանամետ շիական խմբավորումների վրա: Իրանը նշել է, որ իր նկատմամբ մեղադրանքներն անհիմն են:
«Ամերիկացիները սպանել են մեր փառավոր գեներալին, մենք դա անպատասխան չենք թողել և երբեք չենք թողնի»,- ասել է Իրանի նախագահը:
Նրա խոսքով՝ ԱՄՆ-ն երբեք չի մոռանա Իրանի կողմից Իրաքում տեղակայված ռազմակայանի ուղղությամբ հասցված հրթիռային հարվածը, «քանի որ նրանք առաջին անգամ վճռորոշ և արագ հարված ստացան իրենց կատարած բարբարոսական սխալի համար»:
«Նրանք կարծում էին, որ կարող են կոտրել մեր ժողովրդի դիմադրությունը, քանի որ սպանել են այդ դիմադրության ղեկավարին, բայց ստացվեց հակառակը` դիմադրությունը էլ ավելի ամրացավ»,- ավելացրել է Ռոհանին:
Ինչպես ավելի վաղ նշել էր Tert.am-ը, Իրանի իսլամական հեղափոխության պահապանների կորպուսի գեներալ Ղասեմ Սոլեյմանին սպանվել էր հունվարի 3-ին՝ Բաղդադում:
Իրանի գերագույն հոգևոր առաջնորդ այաթոլլահ Ալի Խամենեին խոստացել էր վրեժ լուծել Իսլամական հեղափոխության պահապանների կորպուսի «Ղոդս» հատուկ ստորաբաժանման ղեկավար, գեներալ Ղասեմ Սոլեյմանիի սպանության համար:
Օրեր անց Իրանի հեղափոխության պահապանների կորպուսը հայտարարել էր գեներալի սպանության համար վրեժխնդրության գործողություն սկսելու մասին՝ հրթիռակոծելով Իրաքի արևմուտքում գտնվող ամերիկյան «Այն ալ-Ասադ» ռազմակայանը:
Հետևեք մեզ նաև Telegram-ում