«Իրավունք». «Լուսավոր Հայաստանը» խուսափում է «հակահեղափոխական» պիտակից՝ վաստակելով ավելի վատ պիտակներ

«ԱԺ «Իմ քայլը» խմբակցությունը միայնակ քննարկեց և ընդունեց Սահմանադրության փոփոխությունները, որով Սահմանադրական դատարանի գործող նախագահը պաշտոնանկ է արվում, իսկ ՍԴ երեք դատավոր ուղարկվում են թոշակի: Օրվա վերջում հայտնի դարձավ, որ «Բարգավաճ Հայաստան» կուսակցության խորհրդարանական խմբակցությունը նախաձեռնել է ԱԺ պատգամավորների մեկ հինգերորդի ստորագրահավաք` խորհրդարանի կողմից ընդունված որոշման սահմանադրականության հարցով Սահմանադրական դատարան դիմելու համար:

ԲՀԿ-ն, մասնավորապես, դիմել է «Լուսավոր Հայաստան» կուսակցության գործընկերներին, որպեսզի միանան այս նախաձեռնությանը` երկրում իրավական անվտանգությունը պաշտպանելու և սահմանադրական կարգի տապալումը կանխելու համար:

Սակայն, «Իրավունքի» ունեցած տեղեկությունների համաձայն, հեչ ԼՀԿ-ի սրտով չէ այս նախաձեռնությունը: Վերջիններս անգամ իրենց գործընկերների հետ նեղ շրջանակում անկեղծացել են, թե զուտ խուսափում են, որ «հակահեղափոխականի» պիտակ կկպցնեն իրենց և կշարունակեն մեղադրել, այսպես ասած, նախկիններին աջակցելու մեջ:

Իհարկե, ԼՀԿ-ականներն այս առումով մոռանում են, որ հակառակ դեպքում` արդեն պաշտոնապես վերածվելու են իշխանության գրպանային ընդդիմության, այնուամենայնիվ, թե ինչ ճանապարհով կգնա «Լուսավոր Հայաստանը», պարզ կլինի այսօր»,- գրում է թերթը:

Մանրամասները՝ թերթի այսօրվա համարում: