ԼՂ-ն Մակրոնից ճանաչում է սպասում. Свободная Пресса-ն փորձագիտական կարծիքներ է ներկայացրել

ԼՂ-ն Մակրոնից ճանաչում է սպասում. Свободная Пресса-ն փորձագիտական կարծիքներ է ներկայացրել

ԵՐԵՎԱՆ, 21 ՀՈԿՏԵՄԲԵՐԻ, Tert.amՖրանսիայի կառավարությանն առաջարկվել է ճանաչել Լեռնային Ղարաբաղի անկախությունը: Նման քայլին կոչ է անում «Հանրապետական» կուսակցությունից սենատոր Վալերի Բուայեն: Նրա խոսքով, ԼՂ-ում Ադրբեջանի «հարձակմանը» հակազդել նշանակում է հակազդել նաև «Եվրոպայում թուրքական իսլամիզմի տարածմանը», փոխանցում է Свободная Пресса-ն:

Այս պահին ԼՂ անկախությունը ճանաչել են միայն Աբխազիան, Հարավային Օսիան և Մերձդնեստրի Մոլդովական Հանրապետությունը: Սակայն դրանք միջազգային հանրության կողմից ամբողջապես չճանաչված պետություններ են: Սակայն ի՞նչ կլինի, եթե նման քայլ անի Ֆրանսիան, որն այդ կերպ վիճաբանություն կունենա ոչ միայն Ադրբեջանի հետ, այլև սրացում կսկսվի Թուրքիայի հետ:

Իրավիճակը մեկնաբանել է Ե.Մ. Պրիմակովի անվան միջազգային հարաբերությունների և համաշխարհային տնտեսության ինստիտուտի գիտաշխատող Պավել Տիմոֆևը:

«Իրականում, այստեղ ամեն ինչ այդքան էլ միանշանակ չէ, քանի որ խնդիրը մի քանի մակարդակի վրա է: Առաջինը՝ ներքաղաքական: Բուայեն ներկայացնում է հանրապետականների կուսակցությունը: Եվ, հավանաբար, այդ կուսակցությունը կարող է ընդունել նրա առաջարկած փաստաթուղթը Սենատի շրջանակում, առավել ևս, նրանք մեծամասնությունն են: Սակայն դա չի նշանակում, որ ֆրանսիական գործադիր իշխանությունը ի նկատի կունենա այն և կհետևի այդ բանաձևին: Քանի որ, թեև նախագահ Մակրոնի կուսակցության և հանրապետականների օրակարգը մի շարք հարցերում համընկնում է, սակայն, այնուամենայնիվ, ոչ բոլոր հարցերում»,- նշել է փորձագետը:

Տիմոֆևի կարծիքով՝ Հայաստանը պետք է առաջինն ընդունի ԼՂ անկախությունը, եթե ցանկանում է, որ դա անեն մյուսները: Սակայան կա նաև այլ կարևոր կետ:

«Ֆրանսիան, թեև հպարտանում է որոշումներ կայացնելու իր ինքնուրույնությամբ, վերջին շրջանում շատ հաճախ իր գործողությունները համաձայնեցնում է ԵՄ այլ անդամների հետ: Առաջին հերթին Գերմանիայի հետ: Մանավանդ, երբ խոսքը նման լուրջ հարցին է վերաբերվում»,- կարծում է մասնագետը:

Փարիզի և Անկարայի միջև վիճաբանությունները կապված են ոչ միայն ԼՂ-ի հետ: Երկու երկրների միջև վերջին շրջանում տարաձայնություններ սկսվել են մի շարք տարածաշրջանային ճգնաժամերի շուրջ: Դա Սիրիան և Լիբիան են: Եվ հունա-կիպրա-թուրքական վեճը Միջերկրական ծովի շրջանում: Այդ պատճառով էլ այս նոր սրացումը Թուրքիայի հետ հարաբերություններում, հավանաբար, ցավոտ կլինի: Սակայն փորձագետը կարծում է, որ այն լրջորեն չի փոխի ամբողջ իրավիճակը, քանի որ նման միտումն արդեն շարունակվում է մի քանի տարի:

«Կարծում եմ, լարվածությունը, ամենայն հավանականությամբ, կշարունակվի սրվել: Սակայն, հասկանում եք, Ֆրանսիայի համար ԼՂ-ն և ամբողջ Կովկասը ոչ առաջնային կարևորության մի շրջան է: Այդ պատճառով էլ պատկերացնել, որ Փարիզը պատրաստ է այնտեղ ուղարկել ինչ-որ ռազմական ուժեր, դա ընդհանրապես ֆանտաստիկայի ժանրից է, ընդ որում՝ գիտական»,- կարծում է Տիմոֆևը:

Առավել հավանական է բախումը Արևելյան Միջերկրականի առումով, քանի որ Ֆրանսիայի համար այդ շրջանը մեծ դեր է խաղում անվտանգության տեսանկյունից:

Մինչդեռ «Մերձավոր Արևելք-Կովկաս» հետազոտական կենտրոնի տնօրեն, արևելագետ Ստանիսլավ Տարասովը չի բացառում, որ Փարիզը կճանաչի ԼՂ անկախությունը:

«Արդեն իսկ այդ առաջարկը հարված է Ալիևին մեջքից: Ֆրանսիացի սենատորը հետևել է ԱՄՆ նախկին պետքարտուղար Ջոն Քերիի օրինակին 2016թ. ապրիլյան «քառօրյա պատերազմից հետո»: Այն ժամանակ, որոշ տվյալների համաձայն, Ադրբեջանը հրաժարվել է մասնակցել ժողովին, որը կազմակերպվել էր ԵԱՀԿ Մինսկի խմբի միջնորդությամբ՝ զինված հակամարտությունից դուրս գալու համար: Եվ Քերին զգուշացրել էր Ալիևին, որ եթե նա չժամանի Վիեննա, իրենք կճանաչեն ԼՂ անկախությունը: Ալիևն անմիջապես մեկնել է: Եվ հետագայում նախարարների կաբինետի նիստի ժամանակ հայտարարել էր, որ «իրենց վրա ճնշում են գործադրում»՝ ԼՂ անկախության ճանաչման նպատակով: Նա, սակայն, չէր նշել Քերիի անունը»,- պատմել է փորձագետը:

Նրա կարծիքով, այժմ, երբ ֆրանսիացիները բարձրացրել են այս հարցը, դրդում են Ալիևին բանակցությունների գնալ:

Հետևեք մեզ նաև Telegram-ում