«Թուրքիայի աջակցությունը Բաքվին ԽՍՀՄ փլուզման աշխարհաքաղաքական հետևանքն է». Պուտին

ԵՐԵՎԱՆ, 18 ՆՈՅԵՄԲԵՐԻ, Tert.am: Լեռնային Ղարաբաղում Թուրքիայի դերին կարելի է տալ ցանկացած գնահատական, սակայն նրան չի կարելի մեղադրել միջազգային իրավունքը խախտելու համար: Այս մասին լրատվամիջոցների հետ զրույցում հայտարարել է ՌԴ նախագահ Վլադիմիր Պուտինը, գրում է eadaily.com կայքը:

«Թուրքիան ի սկզբանե ղարաբաղյան կարգավորման ԵԱՀԿ Մինսկի խմբի անդամ էր: Այնպես որ, նա միջազգային ինստիտուտի, կարգավորման միջազգային մեխանիզմի ներսում էր»,– հայտարարել է Պուտինը:

Պուտինը նշել է նաև, որ Թուրքիան այս խմբի համանախագահ չէ, նման կարգավիճակ ունեն միայն Ռուսաստանը, Ֆրանսիան և ԱՄՆ-ն, բայց, այնուամենայնիվ, Թուրքիան Մինսկի խմբի անդամ հանդիսացող 11 պետություններից մեկն է:

«Թուրքիայի գործողություններին կարելի է ցանկացած գնահատական տալ, բայց այդ երկրին դժվար է մեղադրել միջազգային իրավունքի խախտման համար: Ցանկացած ճաշակի գնահատական կարող է լինել, բայց, այնուամենայնիվ, իրավիճակն այնպիսին է, ինչպիսին ես ասացի»,- նշել է ՌԴ նախագահը:

Նա ընդգծել է նաև, որ Թուրքիան երբեք չի թաքցրել Լեռնային Ղարաբաղի հարցում իր կողմից Ադրբեջանին աջակցությունը, ինչը ԽՍՀՄ փլուզման աշխարհաքաղաքական հետևանք է:

«Ինչ վերաբերում է Թուրքիային, Թուրքիայի դերին, դա լավ հայտնի է, դրա մասին բազմիցս ասվել է Ադրբեջանում, և թուրքական կողմը դա երբեք չի թաքցրել: Նրանք միակողմանի աջակցել են Ադրբեջանին: Ինչ կարող եմ ասել, սա ԽՍՀՄ փլուզման աշխարհաքաղաքական հետևանքն է: Մենք սրա մասին միշտ ընդհանուր ենք խոսում, այստեղ ընդհանուր չէ, հստակ իրադարձություններ են, որոնց ականետեսն ենք լինում»,-ավելացրել է ռուս առաջնորդը: