Նիկոլին հաջողվեց մի բան՝ ստեղծել պառակտված, ատելությամբ սնվող ազգ. Մհեր Մկրտչյան (տեսանյութ)
Նմանատիպ
ԵՐԵՎԱՆ, 21 ՆՈՅԵՄԲԵՐԻ, Tert.am: Ես չեմ ուզում խոսել այն մասին, թե ինչ է կատարվել, որովհետև դա բոլորը հասկանում են: Բոլորը՝ կողքի փողոցներում անտարբեր անցնող մարդիկ, տանը բազմոցին նստած օնլայն դիտողները: Ես չեմ հասկանում ընդամենը մեկ բան՝ ինչու այս խայտառակությունից, դավաճանություններից ու բացահայտումներից հետո հավաքվել է ընդամենը մի Ազատության հրապարակ: Այս մասին Ազատության հրապարակում ՀՀ վարչապետ Նիկոլ Փաշինյանի հրաժարականի պահանջով հանրահավաքի ընթացքում հայտարարեց ռեժիսոր Մհեր Մկրտչյանը:
«Երբ տրանսպորտի գինը 100 դրամով բարձրացրին, հզոր բողոք էր, ակցիաներ էին. իսկ հիմա՞, բոլորը երջանի՞կ են, գո՞հ են: Գիտե՞ք, ամենահեշտ պատասխանն այն է, թե մենք Նիկոլին դեմ ենք, ուզում ենք, որ հեռանա, բայց 17 կուսակցություններին չենք վստահում: Ես էլ մի ձեռքի վրա կարող եմ հաշվել՝ քանի հոգու եմ վստահում: Ամբողջ հարցն այն է, որ հիմա այս կուսակցություններն են բողոքում, իրենք են պահանջում Նիկոլ Փաշինյանի հրաժարականը: Իրենց չեք վստահում, դուք արեք, գամ ձեր կողքին կանգնեմ»,-հայտարարեց ռեժիսորը:
Նա ընդգծեց՝ սա իր համար քաղաքական հարց չէ, ինքն էլ քաղաքական մարդ չէ, սա իր համար արժանապատվության հարց է:
«Անկախ նրանից՝ այստեղ ինչքան մարդ կհավաքվի, ես գալու եմ: Գալու եմ մի նպատակով՝ որ վաղն իմ ազգանունից չամաչեմ: Ես անկեղծ եմ ինձ հետ նրանում, որ համարում եմ, որ Նիկոլ Փաշինյանը վտանգ է մեր երկրի, պետականության, մեր և մեր երեխաների վաղվա օրվա համար, և ինքը պետք է հեռանա: Նիկոլին հաջողվեց մի բան՝ ստեղծել պառակտված, իրարից զզվող, ատելությամբ սնվող ազգ, բայց ես համոզված եմ մի բանում՝ այս ատելությամբ լցված վիճակի մեջ մենք ոչ մի հաղթանակի չենք հասնի»,-հայտարարեց Մկրտչյանը:
Նա նաև դիմեց ոստիկաններին՝ ասելով. «Տղե՛րք, Երևանի փողոցներում «Ռեմբո» մի խաղացեք, որովհետև շատերդ երիտասարդ եք, դեռ չեք հասցրել համաշխարհային պատմությունն ուսումնասիրել. մի օր հենց դուք շատ խեղճացած բացատրություններ եք գրելու»:
Հետևեք մեզ նաև Telegram-ում