Արայիկի մտերիմ շրջապատից բացի՝ ոչ ոք պաշտոն չի ստանում, աշխատում են հին ձեռագրով. Դավիթ Գալստյան

ԵՐԵՎԱՆ, 12 ՀՈՒՆՎԱՐԻ, Tert.am: Արայիկ Հարությունյանն ասում է մի բան, անում է բոլորովին այլ բան, Արցախում ընթացող քաղաքական գործընթացները, կադրային նշանակումները մեզ հետ համաձայնեցված չեն: Այս մասին Tert.am-ի հետ զրույցում ասաց Արցախի Հանրապետության ԱԺ «Արդարություն» խմբակցության ղեկավար Դավիթ Գալստյանը ՝ հավելելով, որ վերահաստատում են իրենց դիրքորոշումը, որ թե՛ ԱՀ-ի և թե՛ ՀՀ-ի կառավարությունը պիտի փոխվի: Ըստ նրա՝ Արայիկ Հարությունյանը՝ հակառակ իր խոստմանը, ամեն կերպ փորձում է պահել իշխանությունը:

«Բոլորիս մոտ ակնկալիք կար, որ պատերազմից հետո գոնե զերծ կմնան հին մեթոդներով գործելուց, նման «ունիվերսալ» մասնագետներ ստեղծելուց, մի պաշտոնից մի պաշտոնի տեղափոխելուց: Նրանք ժողովրդի համար ի զորու չեն լավ բան անել: Տեսնում ենք, որ մեկին հանում են նախարարի պաշտոնից, տանում են հատուկ հանձնարությունների գծով խորհրդական նշանակում, մյուսին հանում են, տանում այլ աշխատանքի: Ոչ մեկին այսօր տեղափոխություն կատարելիս չլսեցինք, որ ասեն՝ գործում թերացել է, ազատել են, փոխարենը շնորհակալություն են հայտնում, տանում այլ պաշտոնի»,- ասաց նա:

Դավիթ Գալստյանի խոսքով՝ ձախողված քաղաքական բանակցությունների տրամաբանությունը այն էր, որ ոչ թե մեկ անձը փոխարինի մյուսին, այլ նշանակվի գործից հասկացող մարդ, և պետք է հստակ քաղաքական գնահատական տրվի նախկիների աշխատանքին:

Անդրադառնալով դիտարկմանը, որ Վիտալի Բալանյանն էլ պետք է ազդեցություն ունենար գործընթացների վրա, նույնիսկ հնչում էին տեսակետներ, որ փաստացի Վիտալի Բալասանյանն է ղեկավարելու, իսկ Վիտալի Բալասանյանն իրենց կուսակցության նախագահի թեկնածուն է եղել, Դավիթ Գալստյանն ասաց.

«Թող ժողովուրդը գնահատական տա, փաստացի Վիտալի Բալասանյանն է ղեկավարում, թե ոչ: Ինչպես տեսնում ենք, Արայիկի մտերիմ շրջապատից բացի՝ ուրիշ ոչ ոք պաշտոն չի ստանում, հին ձեռագրով են աշխատում, նշանակումներ են արվում, դրա մեջ ես չեմ տեսնում Վիտալի Բալասանյանի ձեռագիրը: Անվտանգության ոլորտի նշանակումներ դեռ չեն եղել՝ ոստիկանապետ, ԱԱԾ տնօրեն, լավ կլինի տեսնենք՝ ում են նշանակում, ինչ մոտեցումներ ու խնդիրներ են դրվում այդ համակարգի առջև: Մենակ ասելով՝ ոչինչ չի փոխվում: Այս ամենը մեր գլխին ջարդվեց նրա համար, որ այլ բան ասում էինք, այլ բան անում: Եթե նույն ձեռագրով շարունակեն, լավ բան չի սպասվում»,-ասաց նա:

Անդրադառնալով Վատիկանում ՀՀ-ի նախկին դեսպան Միքայել Մինասյանի հայտարարությանը, որ Փաշինյանը 1.5 տարի առաջ Արայիկ Հարությունյանին պատմել է Արցախի հետ կատարվելիքի մասին, վերջինս Կամո Աղաջանյանի հետ միասին վաճառել են Ջաբրայիլում, Հադրութում և Ֆիզուլիում գտնվող իրենց բիզնեսները՝ Դավիթ Գալստյանն ասաց, որ ինքը այդ մասին հայտարարությունից է տեղեկացել.

«Մինչև իշխանությունները թե՛ ԱՀ-ում, թե՛ ՀՀ-ում չփոխվեն, ժողովուրդը չի կարող ճշմարտությունն իմանալ, այն անհասանելի են դարձնելու»,-ասաց նա: