Քաղաքապետարանը՝ «Կարմիր գծերի» սակագների փոփոխության մասին

ԵՐԵՎԱՆ, 21 ՀՈՒՆՎԱՐԻ, Facebook: Երևանի քաղաքապետարանը հերքում է վճարովի կայանատեղերի սակագների փոփոխության ենթարկվելու մասին սոցցանցերում տարածվող լուրերը, Ֆեյսբուքի իր էջում գրել է քաղաքապետի մամուլի խոսնակ Հակոբ Կարապետյանը:

«Թյուրընկալումներից խուսափելու համար հարկ եմ համարում հայտնել հետևյալը՝ Երևանում համայնքի կողմից կազմակերպվող վճարովի կայանատեղերի (կարմիր գծեր) սակագներն անփոփոխ են: Դրանք կշարունակեն լինել՝ մեկ ժամվա համար 100 դրամ, մեկ տարվա համար՝ 12 000 դրամ»,- նշել է Կարապետյանը:

Նրա խոսքով՝ վճարովի կայանատեղերի համար դրույքաչափերը սահմանում է Երևանի ավագանին՝ յուրաքանչյուր տարեվերջին, հաջորդ ամբողջ տարվա համար: Գործող դրույքաչափերը հաստատվել են 2020-ի դեկտեմբերին: