«Մենք՝ Թուրքիան, Ադրբեջանը և Վրաստանը, փորձում ենք Կենտրոնական Ասիայի երկրներին ներգրավել մեր նախագծերում». Չավուշօղլու

«Մենք՝ Թուրքիան, Ադրբեջանը և Վրաստանը, փորձում ենք Կենտրոնական Ասիայի երկրներին ներգրավել մեր նախագծերում, որոնք իրականացնում ենք», – հայտարարել է Թուրքիայի արտգործնախարար Մևլութ Չավուշօղլուն՝ ելույթ ունենալով Անթալիայում ընթացող Դիվանագիտական ֆորումին։

Չավուշօղլուի խոսքերով՝ հենց այդ հարցերն է քննարկել Ուզբեկստան, Թուրքմենստան և Ղրղըզստան կատարած իր այցերի ընթացքում։

«Զրո խնդիր հարևանների հետ» սկզբունքը որդեգրած Անկարան, որը, սակայն, առճակատման մեջ է գրեթե բոլոր սահմանակից (և ոչ միայն) երկրների հետ՝ Կիպրոսից, Հունաստանից մինչև Հայաստան, ըստ թուրքական դիվանագիտության ղեկավարի, «աշխատում է տարածաշրջանին սպառնացող ճգնաժամերի կարգավորման ուղղությամբ՝ ներառյալ Կովկասը»։

«Երկրի արտաքին քաղաքականությունն ազգային արժեքների հայելին է», – շեշտել է Լիբիայում, Սիրիայում, Միջերկրական ծովում, Հարավային Կովկասում ռազմական ներկայություն ունեցող Թուրքիայի արտգործնախարարը։