Մոսկվայում կհանդիպեն ՀՀ, ՌԴ ու Ադրբեջանի փոխվարչապետերը․ միջանցքի հարց չի քննարկվում

Մոսկվայում կհանդիպեն ՀՀ, ՌԴ ու Ադրբեջանի փոխվարչապետերը․ միջանցքի հարց չի քննարկվում

ԵՐԵՎԱՆ, ՀՈԿՏԵՄԲԵՐԻ 19, Times․am: ՀՀ փոխվարչապետ Մհեր Գրիգորյանը վաղը մեկնում է Մոսկվա՝ եռակողմ աշխատանքային խմբով հանդիպմանը։

Գրիգորյանի խոսքով՝ որոշակի պատկերացումներ են ձևավորվել երկաթուղու մասին։

«Որոշակի պատկերացումներ ու նախնական պայմանավորվածություններ ունենք առ այն, որ ապաշրջափակման հետ կապված կարգավորումներն իրականացվելու է ԱՊՀ երկրների իրավական բազայի կարգավորումների շրջանակներում, ունենք քննարկելու ավտոմոբիլային կապի միջոցների և ուղիների հետ կապված հարցեր», – լրագրողների հետ զրույցում ասաց ՀՀ փոխվարչապետը։

Նա ասաց, թե բազմաթիվ խնդիրներ կան, որոնք գործընթացները բարդացնում են։

ՀՀ փոխվարչապետի խոսքով՝ եթե խոսում ենք ապաշրջափակման մասին ու հավատում ենք այդ գաղափարին՝ բնականաբար, դա տարածաշրջանային նշանակություն ունեցող երևույթ է ու Հայաստանի համար շատ կարևոր է։

«Տարածաշրջանային դերակատարությունը խաղաղության հիմնական երաշխիքն է կամ երաշխիքներից մեկը։ Իհարկե, այլ երկրներ՝ Վրաստան, Իրան, առնչություն կունենան հետևանքների հետ, եթե մեզ հաջողվի ինչ-որ լուծումների գալ, բայց եռակողմ հարթակում քննարկումներին ներգրավել որևէ այլ կողմ, ո՛չ, չկա նման բան», – ասաց Գրիգորյանը։

Հայաստանի փոխվարչապետը ևս մեկ անգամ վստահեցրեց ու պնդեց՝ միջանցքի տրամադրման հարց չի քննարկվում։

«Ուղղակի չի քննարկվում, իսկ դուք շարունակում եք քննարկել ու դրա շուրջ հարցեր ձևակերպել», – ասաց Գրիգորյանը։

Հետևեք մեզ նաև Telegram-ում