Դիարբեքիրի եկեղեցու թանգարանում կցուցադրվի 17-րդ դարում տպագրված Աստվածաշունչ
Նմանատիպ
Թուրքիայի քրդական տարածաշրջանի կենտրոն Դիարբեքիրի (Տիգրանակերտ)’ անցյալ տարի վերաբացված Սուրբ Կիրակոս եկեղեցու թանգարանում կցուցադրվի եկեղեցու վերանորոգման համար երկար տարիներ պայքար տարած հայտնի գրող Մկրտիչ Մարկոսյանի նվիրաբերած’ 17-րդ դարում տպագրված Աստվածաշունչը:
Գրողը Ստամբուլի «Ակոս» թերթին հայտնել է, որ Աստվածաշունչն ինքը 12 տարի առաջ գտել է անուշադրության մատնված Սուրբ Կիրակոս եկեղեցում’ զուգարանի թղթերի համար թափված թղթերի կույտի միջից:
Նրա խոսքով’ Աստվածաշունչը տպագրվել է 1690 թ-ին’ Վենետիկի Սուրբ Ղազար վանքում: «Ես այն պահել եմ իմ աչքի լույսի պես: Եվ այժմ, երբ իմացա, որ Սուրբ Կիրակոս եկեղեցում հայերին վերաբերող թանգարան է ստեղծվում, որոշեցի այն նվիրել թանգարանին: Կարեւորն այն է, որ Աստվածաշունչը փրկվել եւ վերադառնում է տուն»,- ասել է հայ գրողը: Մկրտիչ Մարկոսյանը 1993 թ-ից գործող «Արաս» հրատարակչության հիմնադիրներից է:
Թուրքական ԶԼՄ-ներն ավելի վաղ հայտնել էին, որ Դիարբեքիրի քաղաքապետ Օսման Բայդեմիրը հայտարարել է, որ Արեւելքի ամենամեծ քրիստոնեական եկեղեցին համարվող Սուրբ Կիրակոս հայկական եկեղեցու մի մասը գործելու է որպես հայկական մշակույթի թանգարան:
Հետևեք մեզ նաև Telegram-ում