Հայտնի է՝ ով է հաղթել Եգիպտոսում ընթացող նախագահական ընտրություններում

Եգիպտոսի գործող նախագահ Աբդել Ֆաթահ ալ-Սիսին մեծ տարբերությամբ հաղթել է երկրի նախագահական ընտրությունների առաջին փուլում՝ հավաքելով քվեների 89,6%-ը։ Ինչպես տեղեկացնում է ՌԻԱ Նովոստին, այդ մասին հայտարարել է Ազգային ընտրական հանձնաժողովի նախագահ Հազեմ Բադավին։

Այսպիսով՝ 69-ամյա ալ-Սիսին Եգիպտոսի նախագահի պաշտոնը կստանձնի երրորդ անգամ անընդմեջ։

Նրա օգտին է քվեարկել ավելի քան 39 մլն եգիպտացի։

Բադավին նշել է, որ նախագահական այս ընտրությունների ժամանակ ընտրողների մասնակցության ցուցանիշն ամենաբարձրն է եղել երկրի պատմության մեջ` 66,8%։

Եգիպտոսի ընտրական հանձնաժողովն ավելի վաղ հայտարարել էր, որ քվեարկության գործընթացի վերաբերյալ բողոքներ չի ստացել ընտրությունների առաջին փուլուց հետո։

Եգիպտոսում ընտրություններն անցկացվեցին 3 օր՝ դեկտեմբերի 10-ին, 11-ին և 12-ին։