Չարաշահումներ թույլ տվածները պետք է պատժվեն. Այվազյանը խոսել է Շաբոյանի հետ
Նմանատիպ
Օրեր առաջ հրավիրված ասուլիսին ԱԺ տնտեսական հարցերի մշտական հանձնաժողովի նախագահ Վարդան Այվազյանը դժգոհեց. «Ինչո՞ւ պետք է տեղական արտադրանքն այդքան թանկանա»: Վարդան Այվազյանն ասաց, որ պատրաստվում է ՀՀ Տնտեսական մրցակցության պաշտպանության հանձնաժողովի ղեկավարի Արտակ Շաբոյանին հրավիրել և բացատրություն պահանջել՝ պնդելով, որ գործ ունենք ոչ մրցակցային պայմաններում սպեկուլյատիվ գնաճի հետ: Այսօր Times.am-ը փորձեց ԱԺ տնտեսական հարցերի մշտական հանձնաժողովի նախագահից պարզել՝ խոսե՞ց Շաբոյանի հետ, եթե այո, ապա որքանո՞վ էին հիմնավոր ՏՄՊՊՀ-ի ղեկավարի փաստարկները:
«Այո, հարց եմ տվել: Կենտրոնական բանկը կարող էր զսպել միայն դոլար-դրամ հարաբերությունը: Այսինքն՝ ԿԲ-ն կարգավորիչ դեր ունի միայն ֆինանսական շուկայում, բայց գների չհիմնավորված բարձրացում թույլ չտալը, կարգավորելը, հսկողությունն այս դաշտում Տնտեսական մրցակցության պաշտպանության հանձնաժողովի գործն է: Օրենքում հստակ կա, թե չհիմնավորված բարձրացման դեպքում ինչ գործողություններ պիտի կիրառվեն: Ի ուրախություն, կառավարությունն արդեն սկսել է գործուն քայլեր ձեռնարկել՝ դոլարի արժևորման զսպան մեխանիզմներ ամբողջ շղթայով: Վերադառնալով դրամ-դոլար փոփոխությունների ֆոնին չարաշահումներ թույլ տվածներին, պիտի ասեմ, որ նրանք, միանշանակ, պիտի պատժվեն»,-ասաց Այվազյանը՝ հարկ համարելով նշել, որ դրամ-դոլար փոփոխությունը պայմանավորված էր առաջին հերթին արտաքին գործոնով, որը տուրք տվեց հայրենական շատ տնտեսվարողների հարստանալու մոլուցքին՝ չհիմնավորված միջոցներով:
Հետևեք մեզ նաև Telegram-ում