Դաշնակցությանը պատեհապաշտության մեջ մեղադրողը «կույր» է. երբևէ այժմեական շահերով չի առաջնորդվել. ՀՀԿ

Դաշնակցությանը պատեհապաշտության մեջ մեղադրողները լավ չեն ուսումնասիրել նրանց կենսագրությունը և  չեն  ուզում տեսնել ակնհայտը:  Այս մասին լրագրողների հետ հանդիպմանը  նկատեց  ԱԺ ՀՀԿ խմբակցության անդամ Արտակ Դավթյանը:

«Դաշնակցությունը 126 տարվա կուսակցություն է և որևէ ժամանակ կամ  առիթով  նրանց պատեհապաշտության  մեջ  մեղադրելու համար  պետք է  «կույր» լինել: Դաշնակցությունն  ամենահարուստ պատմություն ունեցող կուսակցությունն է և 126 տարվա ընթացքում ամենաշատ բան արածը մեր ժողովրդի համար: Պատմական ամբողջ ժամանակահատվածում երբևէ նա այժմեական շահերով չի առաջնորդվել: Ըստ այդմ՝ ես հերքում եմ պատեհապաշտության մասին դատողությունները, ինչն  ավելի շատ դրանք անողի մասին է խոսում»,-հայտարարեց ՀՀԿ-ական պատգամավորը:

Իսկ որն է պատճառը  ընտրությունների «նախօրեին» Դաշնակցության նման քայլի գնալու, Դավթյանը հորդորեց  պարզաբանումների համար դիմել հենց նրանց. հասցեատերը  ոչ ինքն է, ոչ էլ իր կուսակցական ընկերները:

Հակադարձմանը՝ իսկ ինչո՞ւ ՀՀԿ-ն իր հերթին քաղաքական ուժերից  նախընտրեց ՀՅԴ-ին,  ՀՀԿ-ական պատգամավորն արձագանքեց. «ՀՀԿ-ն պարզած ոչ մի ձեռք օդում չի թողնում», հետո լրացրեց՝ այլ ուժերի հետ ևս պատրաստ են համագործակցության:

Times.am-ի հիշեցմանը, որ ՀՀԿ ղեկավարությունից հայտարարել էին, որ կհամագործակցեն իրենց գաղափարին մոտ ուժի հետ, ըստ այդմ՝ ՀՅԴ-ի կոնկրետ ո՞ր գաղափարն է  մոտ ՀՀԿ-ին, ո՞րն է համագործակցության գաղափարական մեխը, Դավթյանը պատասխանեց՝ ազգային գաղափարը՝ ազգ, պետություն, մշակույթ: