Թեհրանը պատրաստ է պաշտպանել իրեն ցանկացած սպառնալիքից. Իրանի ԱԳՆ-ն պատասխանել է ԱՄՆ-ին

Թեհրանը պատրաստ է պաշտպանել իրեն ցանկացած ոտնձգությունից և սպառնալիքից։ Այս մասին հայտարարել է Իրանի ԱԳ նախարար Աբբաս Արաքչին:

«Մեր ողջ ռազմական ներուժը պատրաստված է երկրի պաշտպանության համար, մենք մտադիր չենք սպառնալիք դառնալ մեզ շրջապատող տարածաշրջանի համար, բայց վճռականորեն կպաշտպանենք մեզ ցանկացած սպառնալիքի և ցանկացած ոտնձգության դեպքում»,- ասել է նա, Մոսկվայում Իրանի դեսպանատան ընդունելության ժամանակ՝ Իրանի բանակի օրվա կապակցությամբ:

Արաքչին այդ մասին հայտարարել է Իրանի և ԱՄՆ-ի միջև իրանական միջուկային ծրագրի շուրջ անուղղակի բանակցությունների երկրորդ փուլի, ինչպես նաև ԱՄՆ նախագահ Դոնալդ Թրամփի հայտարարությունների ֆոնին, թե գործարքի բացակայության դեպքում Իրանը պետք է սպասի «նախկինում չտեսնված ռմբակոծությունների»։