Թրամփի միջամտությունից հետո Զելենսկին Պուտինին կոչ է արել գալ Թուրքիա

Մենք տրամադրված ենք երկարաժամկետ խաղաղ կարգավորման ուղիների որոնմանը։ Այս մասին լրագրողներին ասել է ՌԴ նախագահի մամուլի քարտուղար Դմիտրի Պեսկովը։

Մամուլի քարտուղարը հիշեցրել է, որ Վլադիմիր Պուտինը Հաղթանակի 80-ամյակի տոնակատարություններն ու արտասահմանյան գործընկերների հետ բազմաթիվ հանդիպումներն ամփոփող հայտարարության մեջ հստակ եւ աներկբա շարադրել է Մոսկվայի դիրքորոշումը՝ առանց որևէ նախապայմանի Կիևի հետ ուղիղ բանակցությունները վերսկսելու վերաբերյալ:

Նա նշել է, որ ԱՄՆ նախագահ Դոնալդ Թրամփը նաև կոչ է արել Կիևին անհապաղ և առանց որևէ պայմանի մասնակցել առաջարկվող հանդիպմանը: Իսկ Թուրքիայի նախագահ Ռեջեփ Թայիփ Էրդողանը Պուտինի հետ հեռախոսազրույցում հաստատել է բանակցությունների կազմակերպման համար ամեն ինչ անելու պատրաստակամությունը։

Մայիսի 11-ի գիշերը Պուտինն Ուկրաինային առաջարկել է վերսկսել ուղիղ բանակցություններն՝ առանց նախապայմանների։ Հանդիպումը պետք է կայանա Ստամբուլում մայիսի 15-ին:
Պեսկովի խոսքով՝ այս առաջարկը խոսում է խաղաղ լուծում գտնելու ցանկության մասին, իսկ բանակցությունների նպատակն է վերացնել հակամարտության բուն պատճառները։

Վլադիմիր Զելենսկին Պուտինի նախաձեռնությանը պատասխանել է վերջնագրով՝ Կիևը կնստի բանակցությունների սեղանի շուրջ միայն այն դեպքում, եթե Մոսկվան համաձայնի մայիսի 12-ից լիակատար հրադադարի։ Սակայն Թրամփը Զելենսկուն խորհուրդ է տվել չսպասել հրադադարի, այլ հանդիպել Պուտինի հետ։

Դոնալդ Թրամփի՝ հրապարակավ նման կոչ անելուց հետո  Ուկրաինայի նախագահ Վլադիմիր Զելենսկին հայտարարել է, որ պատրաստ է հինգշաբթի օրը հանդիպել Վլադիմիր Պուտինի հետ Թուրքիայում, եթե նա ուզում է բանակցել։