ԱՄՆ նախագահի նախաձեռնությամբ՝ Իրանն ընդունել է Իսրայելի հետ հրադադարը

Իրանի ազգային անվտանգության բարձրագույն խորհուրդը հայտարարել է, որ Իրանի իշխանությունները համաձայն են ԱՄՆ նախագահ Դոնալդ Թրամփի կողմից հայտարարված հրադադարի ռեժիմին Իսրայելի հետ։ Միաժամանակ Թեհրանը զգուշացնում է, որ պատրաստ է պատասխանել ցանկացած հնարավոր ագրեսիայի, եթե հրադադարի պայմանները խախտվեն։

Խորհրդի հայտարարությունում, որը հրապարակել է IRBA գործակալությունը, գրված է․ «Սա հաղթանակ էր, որը ստիպեց թշնամուն զղջալ, ընդունել իր պարտությունը և դադարեցնել միակողմանի հարձակումը։ Տեղեկացնում ենք Իրանի Իսլամական Հանրապետության մեծ և քաջ ժողովրդի, որ Իրանի զինված ուժերը, չվստահելով թշնամու հայտարարություններին, պատրաստ են վճռական պատասխան տալ ցանկացած ագրեսիվ գործողության»։

Հիշեցնենք, որ հունիսի 13-ին Իսրայելը սկսել էր «Ժողովուրդը՝ առյուծի պես» ռազմական գործողությունը՝ ուղղված Իրանի միջուկային և պաշտպանական արդյունաբերության դեմ։ Ի պատասխան՝ Իրանի ուժերը հարվածել էին Իսրայելին անօդաչու թռչող սարքերով և հրթիռներով։ Հունիսի 22-ին ԱՄՆ-ի ռազմաօդային ուժերը հարվածներ էին հասցրել Իրանի երեք միջուկային օբյեկտներին։ Հունիսի 24-ի վաղ առավոտյան Դոնալդ Թրամփը հայտարարել էր, որ հրադադարի ռեժիմը պաշտոնապես ուժի մեջ է մտել։