10 տարի հետո լինի, ես արդարանալու եմ, դուք եք մնալու մեղավոր ձեր զավակների առաջ. Միքայել Սրբազան
Կարդացեք նաև
Շիրակի թեմի առաջնորդ Միքայել արքեպիսկոպոս Աջապահյանի փաստաբանն ինքնաբացարկի միջնորդություն է ներկայացրել դատավոր Արմինե Մելիքսեթյանին։ Փաստաբան Երեմ Սարգսյանն ընդգծել է, որ համոզված է՝ Մելիքսեթյանը չի կարող այդ գործով ապահովել արդար քննություն։
Նիստերի դահլիճում էլ Միքայել արքեպիսկոպոս Աջապահյանը դիմել է դատարանին. «Դուք, պատվարժան դատարան, իմ բնակության հաշվառման հասցեն կարդացիք՝ եպիսկոպոս Սմբատյան: Վստահ եմ՝ Ձեզ մոտ հարց չառաջացավ՝ ով է եպիսկոպոս Սմբատյանը: Արտակ Սմբատյանը Շիրակի թեմի առաջին առաջնորդն էր: Բազմաթիվ անգամներ նրան բռնեցին, ձերբակալեցին ու բաց թողեցին, և ի վերջո, 1937թ. հայտնի «տռոյկան» գնդակահարեց նրան: Այսօր նրան գնդակահարողների անունները չկան, վստահ եմ՝ նրանց գերեզմաններին խոտ էլ չի բուսնում, բայց Արտակ սրբազանի անունով փողոց կա: Այսօր չլինի, լինի 10 տարի հետո, ես արդարացվելու եմ, բայց դուք լինելու եք մեղավոր: Ձեր զավակներն ամաչելու են: Չեմ կարողանում հասկանալ՝ Ձեզ ի՞նչն է դրդում մասնակից դառնալ այս խայտառակությանը։ Սա է մեծագույն դժբախտությունը ինձ և մեզ համար։ Ես ցավում եմ ձեզ համար»,-ասել է հոգևորականը:
Հիշեցնենք, այսօր Սրբազանի գործով տեղի է ունենում երկրորդ նիստը։ Նախորդ նիստի ժամանակ դատարանը մերժել էր կալանքը փոխելու միջնորդությունը և միաժամանակ երկարացրել սրբազանի անազատությունը ևս 10 օրով։ Դատարանը մերժել էր նաև Միքայել սրբազանի վերաբերյալ գործը Շիրակի մարզի առաջին ատյանի դատարանին փոխանցելու միջնորդությունը և հետաձգել քրեական հետապնդումը դադարեցնելու միջնորդության քննարկումը։
Փաստաբանական թիմը պնդում է, որ դատարանը գործում է իշխանության հրահանգով և նպատակ ունի գործը հնարավորինս արագ ավարտել։ Որպես փաստարկ նրանք մատնանշում են, որ 6 աշխատանքային օրվա ընթացքում անցկացվել է արդեն 4 նիստ:
Նշենք, որ Միքայել արքեպիսկոպոսին մեղադրանք է ներկայացվել իշխանությունը զավթելու կոչի հոդվածով՝ հիմնված նրա մեկ տարի առաջ տված հարցազրույցի վրա, որտեղ հոգևորականը խոսել է հեղաշրջման անհրաժեշտության մասին։ Մինչդեռ այդ խոսքերում մեկ տարի առաջ Գլխավոր դատախազությունը հանցակազմ չէր տեսել և գործ չէր հարուցել։
Հետևեք մեզ նաև Telegram-ում