Մսամթերք արտադրող և վերամշակող թվով 11 տեղական արտադրողների նոյեմբերի 12-ից հնարավորություն է ընձեռնվել իրականացնել գառան, խոզի, տավարի և հավի մսից պատրաստված մսամթերքի արտահանում ՌԴ: Ինչպես «Արմենպրես»-ին տեղեկացրին ՀՀ ԳՆ սննդամթերքի անվտանգության պետական ծառայությունից, առաջիկայում նախատեսվում է հանդիպում արտահանման թույլտվություն ստացած տնտեսավարող սուբյեկտների հետ, որի ընթացքում հայրենական արտադրողներին կներկայացվեն արտահանվող մսամթերքին ներկայացվող Մաքսային միության պահանջները (փաթեթավորում, մակնշում և այլն) ու համապատասխան ընթացակարգերը:
Արտահանման թույլտվություն ստացած ընկերություններն են` «ԱՐԱՔՍ ԹՌՉՆԱՖԱԲՐԻԿԱ» ՓԲԸ, «ՆԱՏՖՈՒԴ» ՓԲԸ, «ԱԹԵՆՔ» ՍՊԸ, «ԲԱՐԻ ՍԱՄԱՐԱՑԻ» ՍՊԸ, «ԲԵԿՈՆ ՊՐՈԴՈՒԿՏ» ՍՊԸ, «ՄԱՐԻԼԱ» ՍՊԸ, «ՄՈՒՇ» ՍՊԸ, «ՆԱՏԱԼԻ ՖԱՐՄ» ՍՊԸ, «ՌԱԶՄԻԿ-92» ԱԿ, «ԱՐԱՐԱՏ» ԱԿ, «ՀԱՄԼԵՏ ՀՈՎՍԵՓՅԱՆ» Ա.Ձ:
ՀՀ ԳՆ սննդամթերքի անվտանգության պետական ծառայության պետ Արմեն Հայրապետյանը և աշխատակազմի անասնաբուժության տեսչության պետ Հովհաննես Մկրտչյանը հոկտեմբերի 27-ին աշխատանքային այցով մեկնել էին ՌԴ` ռուս գործընկերների հետ քննարկելու տեղական շուկայի զարգացման հնարավորություններն ու հեռանկարները: ՌԴ անասնաբուժական և բուսասանիտարական հսկողության դաշնային ծառայության պետ Սերգեյ Դանկվերտի հետ հանդիպման ընթացքում քննարկվել էին ինչպես ՌԴ ձուկ-ձկնամթերք արտահանելու թույլտվություն ունեցող կազմակերպությունների ցանկը, այնպես էլ միս-մսամթերք վերամշակող կազմակերպությունների արտադրանքը ռուսական շուկա արտահանելու նպատակով իրականացվելիք անհրաժեշտ գործողություններն ու ընթացակարգերը:
