Եվրասիական տնտեսական միությանը Հայաստանի անդամակցությունը չի խաթարի Համաշխարհային բանկի ծրագրերը Հայաստանում, և բանկն իր վարած քաղաքականության մեջ որևէ փոփոխություն չի կատարի: Այս մասին լրագրողների հետ հանդիպման ժամանակ հայտարարեց ՀԲ երևանյան գրասենյակի ղեկավար Լորա Բեյլը: Նա շեշտեց, որ Համաշխարհային բանկը կողմնակից է, որպեսզի Հայաստանը հնարավորինս ճկունություն ցուցաբերի և ստեղծված հնարավորություններն օգտագործի իր առևտրային գործընկերների հետ հարաբերություններում: «Համաշխարհային բանկը չի փոխելու իր հանձնառությունները Հայաստանին ֆինանսական օժանդակություն տրամադրելու հարցում: Առանձին առևտրային պայմանագրերը, որ երկիրը կնքում է, չեն խոչընդոտում այն հանձնառություններին, որոնք մենք ստանձնել ենք տվյալ երկրի ու ժողովրդի նկատմամբ»,- «Արմենպրես»-ի հաղորդմամբ` ասաց Բեյլը:
