Հայկական լրատվամիջոցները վերջին օրերին ակտիվորեն քննարկում են Գյումրու քաղաքապետի թեկնածուների հարցը: Հատկապես հետաքրքական է, թե արդյո՞ք «Բարգավաճ Հայաստան» կուսակցությունը կառաջադրի իր թեկնածուին, թե ոչ:
Ինչպես Times.am-ի հետ զրույցում նշեց ԲՀԿ մամուլի խոսնակ Տիգրան Ուրիխանյանը, ԲՀԿ-ն անպայման կառաջադրի իր թեկնածուին: «Իսկ թե ով կլինի այդ թեկնածուն, մենք կհայտնեք ավելի ուշ, որոշումը կայացնելուց հետո: Հիմա այլ մանրամասներ ասել չեմ կարող», նշեց պարոն Ուրիխանյանը:
Նշենք, որ ավելի վաղ մամուլում հրապարակում էր եղել այն մասին, թե կառաջադրվի ՀՀ ԱԺ պատգամավոր Սամվել Բալասանյանի թեկնածությունը: Այս լուրի իսկությունը ճշտել չհաջողվեց, քանի որ հնարավոր չեղավ կապ հաստատել Ս. Բալասանյանի կամ նրա օգնական Զոհրաբ Եգանյանի հետ:
Հիշեցնենք, որ ԱԺ պատգամավորներ Սամվել Բալասանյանը, Մարտուն Գրիգորյանը և Գյումրու պետական մանկավարժական ինստիտուտի ռեկտոր Վարդևան Գրիգորյանն արդեն ցանկություն են հայտնել առաջադրել իրենց թեկնածությունը:
