Մայրությունը միայն ընտանեկան դեր չէ․ դա պատասխանատվություն է ապագայի նկատմամբ․ Դավիթ Անանյան
Կարդացեք նաև
«Միասնության թեւեր» քաղաքական նախաձեռնության համահիմնադիր Դավիթ Անանյանը գրում է․ «Այսօր ապրիլի 7-ն է, Մայրության և գեղեցկության տոնը
Այս օրը պարզապես շնորհավորանքի առիթ չէ։ Սա հիշեցում է այն հիմքի մասին, որի վրա կանգնած է հասարակությունը՝ մայրություն, հոգատարություն, արժանապատվություն։
Մայրությունը միայն կենսաբանական կամ ընտանեկան դեր չէ։ Դա պատասխանատվություն է ապագայի նկատմամբ։
Դա ամենօրյա լուռ աշխատանք է՝ ձևավորելու մարդ, արժեք, պետություն։
Գեղեցկությունն էլ միայն արտաքին չէ։ Այն ուժ է՝ պահպանելու, արարելու, դիմակայելու։ Այն ներքին հավասարակշռությունն է, որը թույլ է տալիս անցնել դժվարությունների միջով՝ չկորցնելով մարդուն մարդու մեջ։
Այսօր մենք շնորհավորում ենք մեր մայրերին, կանանց, քույրերին։ Բայց նաև պարտավոր ենք ինքներս մեզ հիշեցնել, որ պետությունը գնահատվում է ոչ միայն լոզունգներով, այլ այն պայմաններով, որոնք ստեղծում է մայրության համար։
Արժանապատիվ կյանք, անվտանգ միջավայր, վստահելի ապագա։ Սրանք պետք է լինեն ոչ թե ցանկություններ, այլ քաղաքականություն։
Թող այս օրը լինի ոչ միայն շնորհավորանքի, այլ նաև պատասխանատվության օր։
Շնորհավոր Մայրության և գեղեցկության տոնը»։
Հետևեք մեզ նաև Telegram-ում