Եվրախորհրդարանում եվրասկեպտիկների «Եվրոպան՝ հանուն ազատության եւ ժողովրդավարության « (EFDD) խմբակցությունը նախաձեռնել Է Եվրահանձնաժողովի ղեկավար Ժան Կլոդ Յունկերին անվստահություն հայտնելու հարցի քննարկումը, տեղեկացնում է «Արմենպրես»-ը:
Խմբակցությունը կարողացել Է հավաքել Եվրախորհրդարանի պատգամավորների 76 ստորագրություն, ներառյալ EFDD-ի անդամների 44, ինչպես նաեւ դրա կազմի մեջ չմտնող 32 պատգամավորների ստորագրությունները: Այս մասին ասված Է Մեծ Բրիտանիայի անկախության կուսակցության (UKIP) կայքում, որը խմբակցության մաս կազմող կուսակցություններից մեկն Է:
Ստորագրահավաքի պատճառ Է դարձել Լյուքսեմբուրգի բանկերի միջոցով հարկերի վճարումից միջազգային ընկերությունների խուսափման կոռուպցիոն սխեմաների հետ կապված սկանդալը:
Եվրահանձնաժողովի ղեկավարի պաշտոնից Ժան Կլոդ Յունկերին հեռացնելու համար անհրաժեշտ Է, որ Եվրախորհրդարանի անդամների (751 մարդ) ավելի քան 60 տոկոսը քվեարկի նրա պաշտոնանկության օգտին:
Ավելի վաղ Լրագրողների միջազգային կոնսորցիումը (ICIJ) հայտնել Է, որ ավելի քան 300 անդրազգային ընկերություններ, ներառյալ PepsiCo-ն, Apple-ը, Deutsche Bank-ը, կարողացել են հարյուր միլիարդավոր դոլարներ անցկացնել Լոուքսեմբուրգի միջոցով եւ ըստ որում պահպանել միլիարդավոր դոլարների հարկեր: Լյուքսեմբուրգի իշխանությունները ժխտում են միջազգային կորպորացիաների հետ «արտոնյալ պայմաններով» հարկերի գանձման «գործարքների» կնքումը, հաղորդել Է ՌԻԱ Նովոստի գործակալությունը:
