Իրավիճակն իսկապես հրատապ է. Իվետա Տոնոյան

«Իրավիճակն իսկապես հրատապ է։ Խոսքը վերաբերում է վերջին 2-3 օրերի ընթացքում վարչապետ Նիկոլ Փաշինյանի բառապաշարին, բառամթերքին կամ ընդհանրապես գործելաոճին»,-հայտարարել է ԲՀԿ խոսնակ Իվետա Տոնոյանը ԲՀԿ քաղաքական թիմի անդամների կողմից հրավիրած հրատապ ասուլիսում։

Նա նշել է, երբ այս օրերին տարբեր քաղաքական ուժեր լծված են իրենց ծրագրերը, երկրի իրենց տեսլականը, գաղափարախոսությունը հանրությանը ներկայացնելուն, Փաշինյանն ու իր թիմը որդեգրել են մի քաղաքականություն, որտեղ չկա որևէ ծրագրային խոսք, առողջ քննադատություն, որտեղ կա բացառապես անընդունելի լեքսիկոն ու բառամթերք, անհավասակշիռ պահվածք, հաշվեհարդարի, այդ թվում ֆիզիկական, սպառնալիքներ։

«Ասել, որ մեզ համար բացարձակ անընդունելի է  նման պահվածքը, նշանակում է, ոչինչ չասել»,-ասաց Տոնոյանը։

Նա նշել է, որքան ԲՀԿ-ն, Գագիկ Ծառուկյանը հանդես են գալիս հավասարկշռված, ծրագրային դաշտում, նույնքան ոչ հավասարկշռված է դառնում Նիկոլ Փաշինյանը։

«Ես, իհարկե, հասկանում եմ, որ պիկապների վրա թռվռալը, որկրամոլության տեսարանները շատ ավելի մեծ դիտումներ են ապահովում վարչապետ Նիկոլ Փաշինյանի համար, բայց հորդորում եմ վերադառնալ կառուցողական դաշտ ու ներկայացնել գոնե գեթ մի ծրագիր, թե ինչ են իրենք առաջարկում երկիրն այս իրավիճակից դուրս բերելու համար»,-ասել է Տոնոյանը։

Հետևեք մեզ նաև Telegram-ում