Պայթյուններ են տեղի ունեցել Իրանի Բենդեր Աբբաս նավահանգստում

Իրանի հարավում գտնվող Բենդեր Աբբաս նավահանգստում պայթյունների ձայներ են լսվել։ Միևնույն ժամանակ, երկրի մայրաքաղաք Թեհրանի երկնքում նկատվել է Իրանի ռազմաօդային ուժերի ինքնաթիռ։

Axios-ի փոխանցմամբ՝ ամերիկացի պաշտոնյան հայտնել է, որ թիրախավորված բոլոր օբյեկտները գտնվում են Իրանի հարավային հատվածում։ Դրանց թվում են հակաօդային պաշտպանության համակարգեր, ռադարներ, ինչպես նաև անօդաչու թռչող սարքերի կառավարման և հրամանատարական կետեր։

Աղբյուրի խոսքով՝ Վաշինգտոնում կարծում են, որ Իրանի դեմ իրականացվող հարվածները կարող են ստիպել Թեհրանին ավելի կառուցողական դիրքորոշում որդեգրել և հասնել համաձայնության բանակցային գործընթացում։

Սակայն, ինչպես նշում է Axios-ը, ԱՄՆ իշխանությունները նաև գիտակցում են, որ նման գործողությունները կարող են հանգեցնել ռազմական լարվածության հետագա սրմանը և տարածաշրջանում ավելի լայն հակամարտության ռիսկերի աճին։

Իրանի և ԱՄՆ-ի միջև լարվածությունը շարունակում է աճել, մինչդեռ միջազգային հանրությունը կոչ է անում կողմերին խուսափել իրավիճակի հետագա ապակայունացումից։

Հետևեք մեզ նաև Telegram-ում