Հաքերները գողացել են Ջեյմս Բոնդի մասին նոր ֆիլմի սցենարը

«007 գործակալ» Ջեյմս Բոնդի մասին հերթական ֆիլմի պրոդյուսերները հայտարարել են, որ նոր «Spectre» ֆիլմի սցենարը հաքերները գողացել են: Ինչպես հաղորդում է «Արմենպրես»-ը, վկայակոչելով BBC-ն, հաքերները կարողացել են ջարդել Sony Pictures Entertainment կինոընկերության ցանցն ու գողանալ դեռեւս չհրապարակված սցենարը:

«Spectre» ֆիլմի պրոդյուսերները մտավախություն ունեն, որ երրորդ անձը կարող է հրապարակել սցենարը: Հենց այդ պատճառով «Ասոշեյթեդ Պրես» գործակալությանը նրանք հայտնել են, որ սցենարը պատկանում է իրենց եւ հեղինակային իրավունքներն պետք է պահպանվեն աշխարհում:

Նախատեսվում է, որ անգլիացի գործակալի մասին ֆիլմը, Դենիել Գրեգի դերակատարմամբ, էկրան կբարձրանա հաջորդ տարվա նոյեմբերի 6-ին:

Guardians of Peace խմբի հաքերների կիբերգրոհից հետո կինոընկերությունը լուրջ վնասներ է կրել: Հաքերներն ինտերնետում տեղադրել են կինոընկերության նկարահանած մի շարք, դեռեւս էկրան չբարձացած ֆիլմեր: Բացի այդ, նրանք կարողացել են ձեռք բերել ընկերության աշխատակիցների եւ կազմակերպության մասին որոշ տվյալներ եւ կինոընկերության ղեկավարությանը սպառնում են դրանք հրապարակել:

Հաքերային հարձակման գործի հետաքննությանը միացել են ԱՄՆ Հետաքննությունների դաշնային բյուրոն եւ Ազգային անվտանգության նախարարությունը: