«Հրապարակ». Ստեփան Դեմիրճյանը ՀԱԿ-ի թեկնածու՞ն նախագահական ընտրություններում
Նմանատիպ
Հայ ազգային կոնգրեսը կարող է նախագահական ընտրություններից առաջ անակնկալ մատուցել հայ հանրությանը և նախագահի թեկնածու առաջադրել մի մարդու, ում անունը դեռևս չի շրջանառվում: Խոսքը ՀԺԿ նախագահ Ստեփան Դեմիրճյանի մասին է: « Հրապարակն» իր վերլուծականում հիշեցնում է, որ ինչպես արդեն գրել էր, ՀԱԿ ակտիվի մի զգալի մասը ցանկանում է, որ նախագահական ընտրություններում առաջադրվի Լևոն Տեր-Պետրոսյանը’ համարելով, որ դա Կոնգրեսի փրկության միակ հնարավորությունն է: Բայց Տեր-Պետրոսյանը կարծես թե մտադիր չէ տեղի տալ այդ ճնշումներին, մանավանդ որ հասկանում է, թե այս անգամ արդյունքներն ինչքան կարող են տարբեր լինել 2008-ի արդյունքներից, և դժվար թե առաջադրվի միայն այն բանի համար, որ մի քանի հոգի ևս մի քանի տարի Կոնգրեսի անունից հարցազրույցներ տալու կամ հայտարարություններ անելու հնարավորություն ունենան:
Թերթի տեղեկություններով, այս պայմաններում բավական ակտիվացել է ՀԺԿ նախագահ Ստեփան Դեմիրճյանը, ով մասնավոր այցով լինելով Մոսկվայում, այնտեղից վերադարձել է բավական ոգևորված: Նրա շրջապատի ներկայացուցիչները վստահեցնում են, որ այնտեղ նրան հավաստիացրել են, որ առաջիկա նախագահական ընտրություններում Կոնգրեսի թեկնածուն լինելու է հենց ինքը, և խոստացել են համապատասխան նյութական և քաղաքական աջակցություն ցուցաբերել: Ռուսները սիրում են միաժամանակ օգնել և ընդդիմության, և իշխանության թեկնածուներին: «Հրապարակի» աղբյուրները հավաստիացնում են, որ Դեմիրճյանը, լինելով բավական նուրբ ինքնասիրության տեր անձնավորություն, վաղուց դուրս եկած կլիներ ՀԱԿ-ից, եթե չլիներ նախագահական ընտրություններում ՀԱԿ թեկնածուն լինելու հեռանկարը:
