Նախարարի կինը դատի է տվել «Հրապարակ»-ին՝ առանց գումարային պահանջի, hzham.am-ի հոդվածագրի նկատմամբ էլ հետախուզում է հայտարարվելու (տեսանյութ)

«Զինվորական բժիշկների հայկական ասոցիացիա» ՀԿ նախագահ Ռուզան Խաչատրյանի փաստաբան Կարեն Մեժլումյանը հայցադիմում է ներկայացրել դատարան ընդդեմ «Հրապարակ» օրաթերթի`  պատիվն ու արժանապատվությունը պաշտպանելու պահանջով: Այսօր  լրագրողների  հետ հանդիպմանը փաստաբանը տեղեկացրեց, որ օրաթերթին գումարային պահանջ չի ներկայացվել: Այնուհետ  ցույց տալով  համապատասխան   հոդվածների  պատճեները, Մեժլումյանը  մանրամասնեց, որ  «Հրապարակ» օրաթերթում և նույնանուն կայքում տպագրվել է «Հանրությունն ուզում է իմանալ» վերտառությամբ հոդված, որում անդրադարձ է կատարվել ՀՀ պաշտպանության նախարար Սեյրան Օհանյանի կնոջն  ու տեղեկություն տարածվել այն մասին, թե իբր նա տարիներ առաջ վարել է իր մտերիմ ընկերոջ մեքենան և դարձել  վերջինիս մահվան պատճառ: Հավելենք, որ Սեյրան Օհանյանի կնոջը վարկաբեկող  հոդվածների շարք սկսել էր տպագրել  hzham.am կայքը:

«Այդ հրապարակումներից հետո   Ռուզան Խաչատրյանը դիմել է ինձ,  միասին պատրաստել ենք պատասխան, որն ուղարկել ենք «Հրապարակ» թերթի և հոդվածագրի էլեկտրոնային հասցեներին։ Պատասխանն ուղարկվել է մայիսի 23-ին ժամը 13:18-ին, որից 1 ժամ 15 րոպե անց երկրորդ նյութը հրապարակվեց` «Հանրությունն ուզում է իմանալ 2» վերնագրով, որտեղ  արդեն հղում  կար hzham.am կայքին, որտեղից էլ վերցվել էր նյութի հիմնական բովանդակությունը»,-ասաց նա: 

Փաստաբանը երկրորդ նյութը դիտարկեց որպես հերքում տպագրելու մերժում՝ միաժամանակ ակնարկելով, որ հղումը նույնիսկ հարցը չի փակում, քանի որ գործ ունենք զրպարտության տարածման հետ: Ըստ փաստաբանի՝ լրագրողը պարտավոր էր նման տեղեկություն տարածելուց առաջ կապ հաստատել Ռուզան Խաչատրյանի հետ և  ճշտել դրա իսկությունը: Մինչդեռ նրանք անգամ  իրենց  պատասխանն ու հերքումը  մինչ օրս չեն տպագրել, որի վերջնաժամկետը մայիսի 30-նն է:

«Եթե մինչև մայիսի 30-ը պատասխանն ու հերքումը հրապարակվեն, կքննարկենք  հայցից հրաժարվելու հարցը: Գումարային պահանջ չենք ներկայացնում, որովհետև չենք ցանկանում մամուլին նեղել ֆինանսապես, բայց եթե այդ լրատվամիջոցը հարկ չհամարի պատշաճ ժամկետներում կատարել մեր պահանջները, գուցեև քննարկենք նաև գումարային պահանջ ներկայացնելու հարցը»,- ասաց Մեժլումյանը, ով մինչ այժմ որպես փաստաբան մամուլի իրավունքների պաշտպանության դիրքից է հանդես եկել և սա առաջին գործն է, որն ընդդեմ մամուլի է, թեպետ պնդում է՝  ինքը  մնում է մամուլի իրավունքների պաշտպանը:

Ասուլիսին ներկա «Հրապարակ» օրաթերթի լրագրող Սյուզան Սիմոնյանը վստահեցրեց, որ թերթում երկրորդ նյութը տպագրվել է մինչև հերքում ստանալը, ավելին ՝ նյութը գրել է երկկողմանի՝ ընդգրկելով   Ռուզան Խաչատրյանի  ֆեյսբուքյան գրառումը:

Ինչ վերաբերում է hzham.am-ին, ապա այս դեպքում հայցը պատրաստ է, բայց կա խնդիր՝ կայքը  հասցե չունի,  հայտնի չէ, թե ում է պատկանում, որը  պետք է նշվի հայցադիմումում: Ըստ այդմ՝  փաստաբանը դիմելու է իրավապահ մարմիններին հետախուզում իրականացնելու առաջարկով:

Հիշեցնենք, որ hzham.am կայքի նյութում հիշատակված  անձը Գաջի գործարանի նախկին սեփականատեր, գործարար Հովիկ Հայրապետյանն է, որը մահացել էր 2002 թվականին վթարի հետևանքով:

Փաստաբան Մեժլումյանը փոխանցեց, որ նրա  հարազատները կայքի հրապարակումների առնչությամբ հայտարարություն են տարածել,  որում ասվում է.

«Որոշ համացանցային լրատվամիջոցներ ստահոդ և կեղծ տեղեկություն են սպրդում ՀՀ Պաշտպանության նախարար Սեյրան Օհանյանի և նրա տիկնոջ՝ Ռուզաննա Խաչատրյանի վերաբերյալ: Այդ կեղծիքները հատկապես տարածվում են www.hzham.am կայքում, որը սահմանազանցելով բարոյականության բոլոր նորմերը, փորձում է մեր ընտանիքի հանգուցյալ հոր՝ Հովիկ Հայրապետյանի ողբերգական մահը կապել Ռուզաննա Խաչատրյանի անվան հետ, այն դեպքում, երբ նա որևէ առնչություն չունի այդ դեպքի հետ:

Դատապարտում ենք մեր հոր լուսանկարը և անունը ապատեղեկատվություն տարածելու նպատակով օգտագործող լրատվամիջոցին և պահանջում ենք, որպեսզի անհապաղ հերքում տրվի հրապարակված բոլոր նյութերը և լուսանկարները հեռացվեն տվյալ կայքից և հրապարակայնորեն ներողություն խնդրի մեր ընտանիքից»:

Փաստաբանի և «Հրապարակ» օրաթերթի լրագրողի բանավեճի մանրամասները  Ա1+-ի տեսանյութում: