ԼՂՀ իշխանությունները կբանակցեն միայն Արցախի ժողովրդի կողմից ընդունված տարբերակի շուրջ. ԼՂՀ վարչապետ (տեսանյութ)

Արցախում ևս Սահմանադրական բարեփոխումների անհրաժեշտություն են տեսնում, ինչը հորդորում են չկապել ՀՀ-ում տեղի ունեցող գործընթացների հետ:  Այս մասին ԼՂՀ վարչապետ Արայիկ Հարությունյանը հայտարարել է ի պատասխան Times.am-ի հարցադրմանը: Արտաքին քաղաքական  հարթությունում  ԼՂՀ վարչապետը նաև  շեշտել է, որ ԼՂ-ի խնդրի շուրջ բանակցություններ այսօր  գոյություն չունեն, այն, ինչ կա՝ հանդիպումներ են:

–ՀՀ-ում Սահմանադրական փոփոխությունների են գնում՝ նախագահականից անցում կատարելով խորհրդարանական կառավարման համակարգի: Արդեն լուրեր են շրջանառվում,  որ  Արցախում ևս այս ուղղությամբ սկսել են մտածել և նույնիսկ ինչ-ինչ քայլեր կատարել: Ի՞նչ է տալու կառավարման համակարգի փոփոխությունն Արցախին, որն այսօր հնարավոր չէ ունենալ:

-Ես չեմ ուզում դա  կապել ՀՀ-ում տեղի ունեցող պրոցեսների հետ: Միանշանակ  կարող եմ ասել, որ լինելով կուսակցության ղեկավար, մեր հանդիպումներում բազմաթիվ անգամներ նշել եմ, որ կա Սահմանադրական բարեփոխումների անհրաժեշտություն:

Այդ բարեփոխումների միջոցով պետք է փորձել  օպտիմալացնել ընդհանուր պետական համակարգը, կառավարման ինստիտուտները, ՏԻՄ-ում պետք են որոշ հստակություններ: Այսինքն՝ մենք ունենք մեր տեսակետը, չեմ ուզում մանրամասներ բացել, տարբեր գաղափարներ կան: Հիմնական նպատակը՝ թեթևացնել պետական կառավարման ինստիտուտը, առավել արդյունավետ դարձնել աշխատանքը, ինչպես նաև որոշ փոփոխություններ մտցնելով  ունենալ առավել արդյունավետ ՏԻՄ: Այո, անհրաժեշտություն տեսնում ենք, և մի քանի անգամ ոչ պաշտոնական խոսակցություններ են ունեցել  երկրի  քաղաքական ուժերի, դրանց ղեկավարների, ակտիվիստների հետ: ԼՂՀ նախագահի հետ ենք ունեցել զրույց, լուրջ քննարկում  և համոզված եմ, որ  առաջիկայում  այդ  զրույցները  քննարկման նյութ կդարձնենք՝ առանց շտապելու և  լայն   հասարակությանը   մասնակից   դարձնելով  այդ պրոցեսներին:

-Հայաստանի Հանրապետությունը  ԼՂՀ-ի անվտանգության երաշխավորն է,  այսօր ղարաբաղյան հակամարտության կարգավորման  բանակցություններում ՀՀ-ն է ներկայացնում    հայկական   երկրորդ պետության    շահերը, ըստ այդմ՝ ուզենք թե չուզենք   Արցախի համար միևնույն   չպետք է լինի տեղի  ներքաղաքական հեռանկարները,  զարգացումները, ասել կուզի՝  եթե  հանկարծ ՀՀ երկրորդ նախագահը, այնուամենայնիվ, վերադառնա,  ով  ԼՂՀ-ին   դուրս մղեց  բանակցություններից, Արցախում   ողջունողները   շա՞տ կլինեն, թե՞…

-Ես միշտ ասել եմ և այսօր էլ ասում եմ՝  չկան բանակցություններ,  կան  հանդիպումներ: Կան  տարբեր ձևաչափերով հանդիպումներ ՀՀ-ի և Ադրբեջանի ղեկավարության  միջև: Բանակցությունը կլինի, երբ Ղարաբաղը կմասնակցի. առանց Ղարաբաղի բանակցություններ   վարելն   անիմաստ է, վերջին խոսքը  Ղարաբաղինն է:

Ինչ վերաբերում է  անվտանգության երաշխավոր լինելուն,   այո,  ՀՀ գործող նախագահը տարբեր ատյաններից հայտարարել է, որ ՀՀ-ն Արցախի երաշխավորն է,  և որ պատասխանատվություն են ստանձնել, այս առաքելությունը մինչ օրս պատվով են կատարել:  Ինչ   վերաբերում է  երկրորդ նախագահի ասպարեզում   հայտնվելուն, դա ՀՀ քաղաքացիների  գործն է,  ընտրական իրավունքը և նաև ՀՀ երկրորդ նախագահի:

Մենք ողջունում ենք ցանկացած քաղաքական պրոցես ՀՀ-ում, հիմա սահմանադրական բարեփոխումներ են սպասվում, դրանից հետո կտեսնենք ինչ նոր զարգացումներ են տեղի   ունենում  ՀՀ-ում:

-Ի դեպ, արցախյան միջոցառումներին  ԼՂՀ երկրորդ նախագահը  բավականին ակտիվ մասնակցություն է ունենում, գուցե   նաև նա վերադառնա՞:

-Ցանկացած պաշտոնաթող նախագահ միշտ էլ լինում է  քաղաքականության մեջ: Ինչ վերաբերում է իշխանության վերադառնալուն, ապա սա ցանկացած քաղաքացու սահմանադրական  իրավունքն է  և այստեղ խնդիր  չենք տեսնում: Իսկ միջոցառումներին հաճախակի երևալը  Արկադի Ղուկասյանը ճիշտ պահվածքն է:  Սա կարելի է միայն ողջունել,  ոչ թե հետին մտքեր տեսնել: Ցանկացած քաղաքացի և  մանավանդ  պաշտոնաթող նախագահ  չպետք է անտարբեր լինի իր հայրենիքում տեղի ունեցող պրոցեսների մասով:  Ցանկալի է մասնակցությունը նման միջոցառումներին, որը կատարվում  է:

-Օրերս Լարիսա Ալավերդյանն ինձ հետ զրույցում նկատեց. «Ինչպես կան արտահայտություններ՝ սպասում ենք միջազգային հանրությունը հասկանա, որ խնդրի լուծման բանալին ԼՂՀ-ում է, նույն իմաստությունն էլ Արցախն ունի. սպասում են, որ ՀՀ-ի իշխանությունները հրաժարվեն ոչ արդյունավետ բանաձևերից, ավելի արդյունավետ բանաձևեր ՀՀ-ն պիտի գտնի»:  Կա՞ նման սպասում, ի վերջո, դուք ինքներդ էլ մի առցանց ասուլիսներից մեկի ժամանակ  մեր հարցին ի պատասխան  ասացիք, որ   չեք բանակցի   մադրիդյան  սկզբունքների  շուրջ:

-Արցախյան հարցի բանալին Արցախում է,  ցանկացած հանդիպում, տարբերակ պետք է հաստատվի Արցախի բնակչության կողմից: Սա ասել են   Արցախի իշխանավորները բոլոր  ժամանակներում: Ցանկացած տարբերակ պետք է ընդունվի Արցախի ժողովրդի կողմից և նոր միայն  իշխանություններն այդ թեմայով կարող են բանակցություններ վարել:

-Վերջերս Դուք եղաք ՀՀ Տավուշի մարզի սահմանամերձ գյուղերում,  ի՞նչն առաջինը գրավեց   ձեր ուշադրությունը՝ սոցիալական, տնտեսական, ենթակառուցվածքային: Եվ չե՞ք կարծում, որ նման այցերը պետք է շատ լինեն, որպեսզի Արցախում էլ թանկ լինի Տավուշի կամ մեկ այլ հատվածի սահմանները, ինչպես թանկ են Արցախի հատվածներն  այնտեղ: Ի վերջո, գոյություն ունի մեկ երկիր՝ Հայաստան և դրանում նաև  Արցախը:

-Արցախցիներն այսօր չպետք է ապացուցեն, որ հայրենիքի ցանկացած տեղում վտանգի դեպքում պատրաստ են իրենց մասնակցությունը բերել այնպես,  ինչպես Սարդարապատի  ժամանակ,  պատերազմի ժամանակ էլ շատ արցախցիներ իրենց մասնակցություն են նաև ՀՀ-ի սահմանների պաշտպանությանը: Սա հերթական քայլն է, այո, համարում ենք, որ նման քայլ, պետք է հաճախակի կատարել՝ ցույց տալու  մեր միասնությունը, հակառակորդին ապացուցելու, որ զենքի ձեռքբերման հետ կապված հաճախ հնչող հայտարարություններն Արցախի կամքի վրա որևէ ազդեցություն չեն թողել:

Ես  նկատել եմ, որ ՀՀ-ի կառավարությունն  ուշադրությոան կենտրոնում է պահում  սահմանամերձ գոտիները   ճանապարհների, ենթակառուցվածքների առումով, ինչպես նաև դպրոցների,  համայնքային կենտրոնների:  Իհարկե,   կան դեռ   չլուծված խնդիրներ, բայց   նկատել եմ, որ շատ պետական ծրագրերում մեծ տեղ են գրավել  սահմանամերձ գոտիները: Վերջերս   խոսվում է տարբեր արտոնությունների մասին՝ հարկային և այլն: Սա միայն   կարելի  է ողջունել:

-Արցախում էլ ԵԱՏՄ-ին ՀՀ-ի անդամակցումից սպասելիքներ ունեին, դուք հիասթափված  չե՞ք՝ հաշվի առնելով, որ սպասելիքները չեն արդարացվել մինչ այս պահը:

-Իհարկե հիասթափված  չեմ, որովհետ  մեծ սպասումներ չենք  ունեցել,  միայն  հեշտացել է միության երկրների հետ  առևտրաշրջանառությունը՝ շատ հեշտ, շատ նորմալ պայմաններով: Այլ թեմա է ՌԴ-ի տնտեսական վիճակը, որն իր ազդեցությունն է ունեցել ՀՀ-ի տնտեսության վրա, ինչպես  նաև Արցախի: Այո, մեր արտահանողները, որ հիմնականում ՌԴ էին արտահանում, ռուբլի-դոլար փոխարժեքի  տատանումների հետ կապված վնասներ են կրում, այսինքն՝ ակնկալվող շահույթը չի ապահովվում: Սա այլ թեմա է, այստեղ պետք է գործիքներ կիրառենք, բայց այն, որ այդ միությունից մենք չենք հիասթափվել, հակառակը՝ ծրագրեր  ունենք համագործակցելու և օգտվելու այդ շուկայից: Տնտեսական իրավիճակը  ոչ թե միության հետ է կապված, այլ ՌԴ-ի և նավթ արտադրող երկրների տնտեսական վիճակով է պայմանավորված՝  նավթի, պղնձի գների անկում, որը  միության ձևավորման հետ որևէ առնչություն չունի: Պետք է օգտվենք ստեղծված հնարավորությունից   և տարիների ընթացքում տեսնելու ենք  դրա դրական ազդեցությունը: Ես հաճախակի եմ նշել՝   եթե կան խնդիրներ,  դրանք պետք է լուծել առաջին հերթին  օգնելով   մեր   տնտեսվարողներին:

-Եվ վերջում՝ ի՞նչ է փոխել ԼՂՀ խորհրդարանում  ընդդիմադիր նոր ուժերի ներկայությունը:

-Վաղ է դեռ խոսել նոր ընդդիմադիր ուժի մասին, քանի որ մայիսին է եղել ընտրությունը, հետո պասիվ ամառային ժամանակաշրջան: Մենք ողջունել ենք  այդ ուժին՝ փորձառու նախկին զինվորականներով, գործիչներով, մտավորականներով  համալրված,  միայն կարելի է ողջունել: Համոզված եմ, որ արդյունավետ աշխատանք են իրականացնելու պառլամենտում:

Մարիամ ՊԵՏՐՈՍՅԱՆ

Հետևեք մեզ նաև Telegram-ում