«Պոլիտշկոլաների» դեմ պայքարող Աշոտ Նավասարդյանը դեմ չէր լինի ՀՀԿ քաղաքական դպրոցի՞ն

ՀՀ նախկին վարչապետ Անդրանիկ Մարգարյանի անվան քաղաքական դպրոց հիմնելով Հանրապետականը փորձում է բարելավել կուսակցության անդամների,  համակիրների կազմակերպչական  և ինտելեկտուալ կարողությունները, երևան բերել քաղաքագիտական նոր միտք և մտածողություն: Այս մասին լրագրողների հետ հանդիպմանը հայտարարեց ՀՀԿ փոխնախագահ Արմեն Աշոտյանը՝  գաղափարը ծաղրողներին հիշեցնելով, որ ԱՄՆ-ի Դեմոկրատական և Հանրապետական  ուժերն ունեն իրենց  քաղաքական կենտրոնները,  քաղաքական դպրոցի ավանդույթներ կան նաև հետխորհրդային երկրներում:

Քաղաքական դպրոցում դասավանդելու են ինչպես  կուսակցության համապատասխան թեմաներին և ոլորտներին տիրապետող անդամները, այնպես էլ ակադեմիական շրջանակներից հրավիրված դասախոսներ, որոնց  քաղաքական պատկանելիությունն ըստ Աշոտյանի,  երկրորդական է այս դեպքում: Աշոտյանն այն կարծիքին է, որ ընդդիմադիր գործիչների շարքում կան այնպիսիք, որոնցից սովորելու շատ բան կա, դպրոցում դասախոսելու ենթականերից սակայն տրվեց միայն Ստյոպա Սաֆարյանի անունը, որին Աշոտյանն անձամբ է հրավիրելու: Չի բացառվում, որ արտասահմանյան պատվիրակություններից ևս պարբերաբար դասախոսություններ ունենան:

Այս մտքի ֆոնին Աշոտյանն արձագանքելով  լրագրողների «մտահոգություններին», վստահեցրեց՝  Առաքել Մովսիսյանը, Մհեր  Սեդրակյանը չեն  դասավանդի ՀՀԿ-ի անվճար ուսուցմամբ դպրոցում: Ի դեպ, Աշոտյանն ինքն էլ կարող է դասավանդել, նրան է վերապահված նաև կազմակերպչական խնդիրների լուծումը: Ասում է, որ սա չի արվում, որպեսզի  ինքը գործազուրկ չմնա, քանի որ աշխատանք ունի. երգեր է գրում և հեռուստահաղորդում վարում:

Դիտարկմանը, որ ՀՀԿ հիմնադիրներից Աշոտ Նավասարդյանը պայքարել է «պոլիտշկոլաների» դեմ,  որի հետ համամիտ է նաև ՀՀԿ խորհրդի անդամ Աշոտ Աղաբաբյանը՝ հայտարարելով, որ կուսակցական դպրոցը դիկտատուրա է, մինչդեռ «պոլիտշկոլաների» ժամանակն անցել է, Աշոտյանը պնդեց. «Դպրոց հիմնելու որոշումը գործադիր մարմնում է կայացվել և բնական է, որ  ՀՀԿ խորհրդի գալիք նիստում, որի անդամ է պարոն Աղաբաբյանը, որոշման մասին լրացուցիչ տեղեկություններ կհաղորդենք: Պետք չէ զարմանալ, որ կուսակցության ներսում կա բազմակարծություն, ճիշտ հակառակը՝ կարծում եմ պետք է ուրախանաք, որ ՀՀԿ-ին հաջողվել է ունենալ քաղաքական պլյուրալիզմ»:

Աշոտյանը շարունակելով վստահեցրեց՝ Աշոտ Նավասարդյանը դեմ չէր լինի ՀՀԿ քաղաքական դպրոցի ստեղծմանը. «Նավասարդյանը ժամանակին պատրաստվել է Մարշալի ինստիտուտում»: