Իսրայելը մեզ ռազմական նշանակության բարդ սարքավորում չի առաջարկել, բայց ունենք հեռահար միջոցներ, որոնք մինչև Բաքու կհասնեն (տեսանյութ)

«Մենք ունենք հեռահար այնպիսի միջոցներ, որոնք մինչև Բաքու կհասնեն: Եթե մենք այս ամենը չունենայինք, ապա Ադրբեջանն ինչ-որ տեղ իրեն զսպված չէր զգա»,- «Կենտրոն» հեռուստաընկերության «Ուրվագիծ» հաղորդման ժամանակ հայտարարեց  ՊՆ ռազմական ավիացիոն ինստիտուտի պետ, գնդապետ Դանիել Բալայանը՝ նշելով, որ ապրիլյան քառօրյա պատերազմում հայկական կողմը չի օգտագործել իր ամբողջ զինանոցը: Այսինքն՝ գործողություններն եղել են միայն  թշնամուն դուրս շպրտելու  կամ ներս չթողնելու ուղղությամբ: Գնդապետն այստեղ հիշեցրել է, որ  ՀՀ ռազմական դոկտրինը պաշտպանողական է, ոչ թե հարձակողական,  ուստի  հայկական կողմն  անհրաժեշտ պահի միայն հակահարձակողական  գործողությունների է  գնում: 

Անդրադառնալով քննադատություններին, թե քառօրյա պատերազմի օրերին մեր հետախուզությունը լավ չի աշխատել, Բալայանն ասել է, որ եթե հետախուզական տվյալներ չունենայինք, հնարավոր չէր լինի ամբողջովին դիմակայել ադրբեջանական լայնածավալ հարձակմանը: Նրա խոսքով,  իհարկե, արբանյակային հետախուզություն չունենք, բայց հետախուզական առումով շատ լուրջ հնարավորություններ ունենք և ադրբեջանական զորքերի ողջ տեղաշարժից տեղյակ ենք:

«Մենք գեոսպուտնիկ չունենք, ճիշտ է պետք է, ամեն միջոց էլ պետք է ունենաք, բայց գեոսպուտնիկն էլ իր բացասական կողմն ունի. ապրիլյան այդ օրերին այն չէր օգնի, քանի որ ամպամած օրեր էին, իսկ երբ ամեն ինչ փակ է, նրա տեսասարքավորումները ցույց չեն տալիս»,-շեշտել է  Բալայանը և նկատել, որ ապրիլյան ռազմական գործողությունների օրերին Ադրբեջանի կիրառած ԱԹՍ-երի թվաքանակը նորություն էր, որն այսօր հայկական կողմին մղել է այլ խնդիրների լուծման, և որ հայկական կողմին հաջողվել էր դեռ մեկ տարի պարզել է, որ Ադրբեջանն իսրայելական  արտադրության լուրջ հնարավորություններով ընդամենը 10 միավոր անօդաչու սարք ունի:

«Սա նոր տեխնոլոգիա էր, առաջին անգամ էր կիրառվում, իմ անձնական կարծիքով՝ դրանք արդեն իրենք  չէին ղեկավարում,  քանի որ  սա բարդ տեխնոլոգիական սարքավորում է»,-լրացրել է ՊՆ ռազմական ավիացիոն ինստիտուտի պետը՝ սլաքն ուղղելով իսրայելցի մասնագետների կողմը՝ հիշեցնելով, որ հայկական զինուժը կարողացել է նաև դրանցից ոչնչացնել, ավելին, առհասարակ, կարողանում են համապատասխան միջոցներով խանգարել ադրբեջանական ԱԹՍ-երի աշխատանքին:

Հարցին՝ ճի՞շտ է, որ Իսրայելը նույն զինատեսակից նաև ՀՀ-ին է վաճառել, Դանիել Բալայանը պատասխանել է. «Ոչ, Իսրայելը մեզ ոչ մի երկակի կամ ռազմական նշանակության բարդ սարքավորումներ չի վաճառել: Եթե ինչ-որ բան առաջարկում են, ապա դա անցած քաղաքացիական պատմություն է: Իսկ այդպիսի գներ տալ անցած էտապի բաներին, որ արդեն պատմություն է, իմաստ չունի»:

Հիշեցնենք, որ ՀՀ պաշտպանության նախարարի առաջին տեղակալ Դավիթ Տոնոյանը «Կիրակնօրյա վերլուծական Թամրազյանի հետ» հաղորդման ժամանակ հայտարարել էր, որ  Իսրայելը նույն ապրանքատեսակները, որոնք վաճառել է Ադրբեջանին, առաջարկել է նաև Հայաստանին, բայց դրանք գնելու անհրաժեշտությունը չի եղել:

Ինչևէ, Դանիել Բալայանը հերքել է տարածված տեղեկություններն այն մասին, թե պաշտպանության նախարարությունը  չի համագործակցում ՏՏ ոլորտի ներկայացուցիչների հետ:

«Եթե ինչ-որ պատճառներով գործարքը մեկ, երկու, երեք հոգու հետ չի կատարվել, չի նշանակում, թե ՊՆ-ն այդ գործառույթներով զբաղված չէ: Եթե մենք չկիրառեինք միաժամանակ նաև բարձր տեխնոլոգիաները, ապա այս 4 օրվա պատերազմի ընթացքում բավականին լուրջ պարտություններ կունենայինք: Այն, որ չկարողացավ առաջ գնալ, հետախուզական և այլ միջոցների կիրառումն է»,– ասել է գնդապետը՝ միաժամանակ նշելով, որ հայ մասնագետների առաջարկած սարքերի արժեքը շատ բարձր է, և կիրառման ժամանակ դրանք հաճախ չեն ապահովում իրենց իսկ կողմից նախանշած չափանիշները. «Ասում են կարող ենք մեքենա պատրաստել, բաց այն ձեզ կտանք կամ առանց անիվների, կամ առանց շարժիչ, էսպես չի լինում: Մեր խոսակցության թեման եղել է, որ ինքնակառավարվող  ԱԹՍ-եր պիտի սարքվեին»:

Ինչ վերաբերում է պատերազմական գործողությունների օրերին ստորաբաժանումներում զինամթերքի պակասության քննադատություններին, Բալայանը նշել է, թե ամեն մի հենակետ իր չափանիշներով զինամթերք է ստանում՝ միաժամանակ չբացառելով, որ հնարավոր է մի զորամասում խնդիր եղած լինի, այն էլ, որովհետև ճանապարհը եղել է միակողմանի և կրակի տակ: Բալայանը հերքել է նաև սնունդի հետ կապված խնդիրները. «Զորքը հագնված է, սնունդը տեղն է,  ուտելիքը լիքն է,  90-ականներ սկիզբը չէ, կանոնավոր բանակ է, պլանավորված ամեն ինչ ապահովվում է»:

Չանտեսելով նաև հակամարտող ռազմական բալանսի խախտման շուրջ խոսակցությունները, գնդապետը նկատեց, թե դա ոչ մեկ չի հերքում, քանի որ Ադրբեջանի ռազմական բյուջեն 3 մլրդ-ի սահմանում է, մինչդեռ Հայաստանը նման չափի գումար չի կարող ծախսել:

«Իրենք գնեցին Տ-90 տանկեր, 100 հատ տանկ գնեցին, բայց ուր էր արդյունքը»,-հավելել է նա:

Մարիամ ՊԵՏՐՈՍՅԱՆ