Կառավարությունը մինչև մայիս ԱԺ կներկայացնի 2015թ. բյուջեի հաշվետվությունը

Կառավարությունը հաստատեց 2015 թ. բյուջեի կատարման տարեկան հաշվետվությունը՝ ՀՀ պետական կառավարման մարմիններին հանձնարարելով մինչև ապրիլի 26-ը ՀՀ ֆինանսների նախարարությանը ներկայացնել իրենց դիտողությունների ու առաջարկությունների վերաբերյալ հաշվետվություն:

ՀՀ ֆինանսների նախարար Գագիկ Խաչատրյանն ասաց, որ բյուջեի հաշվետվությունն Ազգային ժողովին է ներկայացվելու մինչ մայիսի մեկը:

Հաշվետվության մեջ նշվում է, որ անցյալ տարի իրականացվել են արտահանմանն ուղղված արդյունաբերական քաղաքականության ռազմավարության մեջ ընդգրկված 8 ոլորտի զարգացման համար նախատեսված աշխատանքները: 2015 թվականի պետական աջակցության ծրագրի շրջանակում մասնակի սուբսիդավորվել են 16 ընկերության վարկերի տոկոսադրույքներ: Կայացել են «Արտադրված է Հայաստանում Էքսպո 2015» և «Yerevan Show» 5-րդ միջազգային ոսկերչական ցուցահանդեսները: Անցյալ տարի ՓՄՁ պետական աջակցության ծրագրի շրջանակում սկսնակ և գործող շուրջ 6000 ՓՄՁ սուբյեկտներին տրամադրվել է 13194 աջակցություն, որի շուրջ 95%-ը՝ ՀՀ մարզերում, առավելապես հեռավոր և սահմանամերձ համայնքներում: Նոր սերնդի ՀԴՄ-ների արժեքի փոխհատուցման ծրագրի շրջանակում աջակցություն են ստացել 611 ՓՄՁ սուբյեկտներ:

Պետբյուջեի շրջանակում զինվորական կենսաթոշակների չափերը բարձրացվել են 2015 թվականի հուլիսի 1-ից, մասնավորապես, զինվորական կեսնաթոշակի չափը հաշվարկելու համար հիմնական կենսաթոշակի չափը սահմանվել է 16000 դրամ (14000 դրամի փոխարեն), իսկ զինվորական ծառայության ստաժի մեկ տարվա արժեքը` 1500 դրամ (1300 դրամի փոխարեն):

Երկարամյա ծառայության զինվորական կենսաթոշակի միջին չափը 2014-ի համեմատ ավելացել է մոտ 15%-ով: 2016 թ. հունվարի 1-ի դրությամբ հաշվառված է եղել 525391 կենսաթոշակառու և սոցիալական նպաստ ստացող, որոնցից 463107 ը` աշխատանքային կենսաթոշակառու, 62284-ը` նպաստառու, 2318-ը` շարքային կազմի զինծառայության հետ կապված կենսաթոշակ ստացող (թիվը չի ներառում ՀՀ պաշտպանության նախարարության, ՀՀ ոստիկանության (ՆԳՆ), ՀՀ դատախազության, այլ համակարգերի կենսաթոշակառուներին), 171-ը` պետական պաշտոն զբաղեցրած անձինք:

Առանձին կատեգորիայի կենսաթոշակառուների (զինծառայողների և նրանց ընտանիքների անդամների) սոցիալական պաշտպանվածության մակարդակը բարձրացնելու նպատակով 2015 թվականի հունվարի 1-ից Հայրենական մեծ պատերազմում և Արցախյան ազատամարտում զոհված զինծառայողների ընտանիքների անդամներին մինչ այդ նշանակված 2 կենսաթոշակից մեկի` զինվորական կենսաթոշակի փոխարեն նշանակվել է պարգևավճար, որի չափը գերազանցել է նախկին կենսաթոշակի չափը հիմնականում 40-50 տոկոսով:

Արդյունքում` շուրջ 6300 անձանց զինվորական կենսաթոշակի փոխարեն վճարվել է դրա չափն էականորեն գերազանցող պարգևավճար: Միաժամանակ սահմանվել է, որ զոհված զինծառայողի ընտանիքի՝ աշխատանքային կենսաթոշակ ստացող անդամը պարգևավճարի իրավունք է ձեռք բերում` անկախ աշխատելու հանգամանքից: Այս դեպքում վերականգվել է շուրջ 76 շահառուի պարգևավճար ստանալու իրավունքը: 2015 թվականի մայիսի 1-ից կրկնապատկվել է Հայրենական մեծ պատերազմի վետերանների ամենամսյա պատվովճարի չափը՝ 25000 դրամից դառնալով 50000 դրամ: