Ադրբեջանն արտաքին աջակցություն ուներ լայնածավալ գործողություններ սկսելու. փորձագետներ
![Ադրբեջանն արտաքին աջակցություն ուներ լայնածավալ գործողություններ սկսելու. փորձագետներ](https://times.am/v3/wp-content/uploads/2016/05/ccd7fba04571450a52e91e80f1b67e52-1500x844.jpg)
Նմանատիպ
Քաղտեխնոլոգ Վիգեն Հակոբյանի դիտարկմամբ՝ եթե մինչև ապրիլյան պատերազմը իշխանությունների համար ներքաղաքական կոնֆիգուրացիան հստակ գծագրված էր, ապա պատերազմական գործողություններից հետո այն անկանխատեսելիության որոշ էլեմենտներ է պարունակում: Լրագրողների հետ հանդիպմանը վերլուծաբանը հիշեցնում է՝ սկսած 1988 թվականից ՀՀ-ում միշտ էլ ներքաղաքական զարգացումների, իշխանության ձևավորման տարբեր կոնֆիգուրացիաների վրա էական ազդեցություն է ունեցել արցախյան գործոնը. պալատական միակ իշխանափոխությունը հենց այս գործոնի ներքո տեղի ունեցավ:
«Այժմ իրավիճակը ինչ-որ չափով նույնն է։ Նորից սեղանին են դրված Մադրիդյան սկզբունքները, որոնք շատ նման են այն ժամանակվա փաթեթային տարբերակին»,- ասաց վերլուծաբանը և պատահական չհամարեց այն, որ նորից ակտիվ խաղի մեջ է մտցվել առաջին նախագահ Լևոն Տեր-Պետրոսյանը, ինչը նաև վտանգահարույց է և մտահոգիչ. «Նա հայտնի է իր լայն կոմպրոմիսի գնալու ունակությամբ, որը ժամանակին պարտվողական էր կոչվում և տեղի ունեցավ 98-ի պալատական իշխանափոխությունը»:
Ըստ Հակոբյանի՝ Ադրբեջանի սանձազերծած ապրիլյան պատերազմը որոշակիորեն փոխեց նաև հասարակության տրամադրություններն աշխարհաքաղաքական վեկտորների առումով. այսօր նա այլևս իր իր անվտանգության երաշխիքները չի կապում միայն ու միայն ՌԴ-ի հետ:
Հանդիպմանը ներկա քաղաքական վերլուծաբան, քաղտեխնոլոգ Արմեն Բադալյանն իր հերթին պնդեց, որ ապրիլյան պատերազմը չփոխեց ոչ հասարակությանը, ոչ էլ առավել ևս իշխանությանը, ինչի վկայությունը Հրազդանի ընտրակաշառքներով ընտրությունների արդյունքն է և մոնոպոլիան, որն արմատախիլ անելու որոշում այդպես էլ չեղավ:
Քաղտեխնոլոգ Արմեն Բադալյանը հիշեցրեց, այսպես ասած, Լավրովի պլանի մասին և այստեղից էլ կարծիք հայտեց, թե հնարավոր է հենց ՌԴ-ի ձեռքից նախաձեռնությունը վերցնելու համար Արևմուտքը հրահանգեց Ադրբեջանին անցնել ռազմական գործողությունների:
Անդրադառնալով Ադրբեջանի՝ լայնածավալ գործողություններ պլանավորելու հիմքերին, քաղտեխնոլոգները միանշանակ նշեցին, որ ապրիլյան պատերազմը չէր կարող սանձազերծվել առանց արտաքին գործոնի կամ «դոբրոյի»: Օրինակ՝ այն կարող էր լինել ՌԴ-ի իմացությամբ, բայց որոշակի սահմաններում, քանի որ ըստ Արմեն Բադալյանի, հնարավոր է, որ լայնամասշտաբ պատերազմ լինի, սակայն Ռուսաստանը թույլ չի տա, որ Ադրբեջանը հասնի լայնածավալ արդյունքների:
«Եթե լուծվում է Լեռնային Ղարաբաղի հակամարտության հարցը, դա նշանակում է, որ Ռուսաստանն այս տարածաշրջանում կորցնում է ազդեցության շատ ուժեղ լծակ, որով ճնշում է գործադրում և Ադրբեջանի, և Հայաստանի վրա: Այսինքն՝ եթե այս կոնֆլիկտը չլինի, հնարավոր է երկուսն էլ գնան Արևմուտք կամ վերջինը երկուսին էլ վերցնի»,-ընդգծեց վերլուծաբանը՝ հավելելով, որ Անդրկովկասը ԼՂՀ-ով ուրիշ Անդրկովկաս է:
«Կան աշխարհաքաղաքական կենտրոններ, ովքեր շահագրգիռ չեն, որպեսզի այս տարածաշարջանում ռադիկալ լուծումներ լինեն, քանի որ այս կոնֆլիկտի առկայությունն է թույլ տալիս կառավարել ռեգիոնը»,– լրացրեց քաղաքական տեխնոլոգ Վիգեն Հակոբյանը՝ չբացառելով Արևմուտքի հրահրումն Ադրբեջանին.«Գուցե արևմտյան կողմը հրահանգեց, որ Լավրովի ծրագիրը չեղյալ լինի, հնարավոր է դա էլ լինի, դրա համար կարող ենք ընդամենը ենթադրել, բայց որ Ադրբեջանին աջակցություն կա ռազմական գործողություններ սկսելու դա արդեն տեսանելի էր»:
Վ.Հակոբյանի խոսքով, արդեն հասունացել է պահը, որ համանախագահների կողմից նոր փաստաթուղթ առաջարկվի, քանի որ բանակցությանների սեղանին դրված փաստաթուղթը երկու կողմին էլ ձեռնտու չէ.«Լավագույն դեպքում, կարծում եմ, համանախագահները կարող են նոր առաջարկներ մտածեն»,- ասաց նա՝ միաժամանակ հավելելով, որ բանակցությունների մասին խոսելն անիմաստ է, քանի դեռ իրավիճակը չի հանդարտվել:
Հետևեք մեզ նաև Telegram-ում