Խոշոր չափերի կաշառք ստանալու համար ՀՀ ԶՈՒ փոխգնդապետին մեղադրանք է առաջադրվել
![Խոշոր չափերի կաշառք ստանալու համար ՀՀ ԶՈՒ փոխգնդապետին մեղադրանք է առաջադրվել](https://times.am/v3/wp-content/uploads/2016/06/83492add2fea62a4a10303460aad2aa9.jpg)
Նմանատիպ
ՀՀ քննչական կոմիտեի զինվորական քննչական գլխավոր վարչության ՀԿԳ քննության վարչությունում քննվող քրեական գործով մեղադրանք է առաջադրվել զինկոմիսարիատի 2-րդ բաժանմունքի պետ, փոխգնդապետ Շ.Ավետիսյանին՝ առանձնապես խոշոր չափերի կաշառք ստանալու համար։ Այս մասին տեղեկացրին ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժնից:
Նախնական քննությամբ բավարար ապացույցներ են ձեռք բերվել առ այն, որ զորակոչային բաժանմունքի պետ, փոխգնդապետ Շ.Ավետիսյանը զինկոմիսարիատում հաշվառված երիտասարդի օգտին գործողություններ կատարելուն նպաստելու, այն է` 2016թ-ի ամառային զորակոչից 3 տարի ժամկետով տարկետում հատկացնելու համար, նրա մորից պահանջել է առանձնապես խոշոր չափերի` 5.730.960 ՀՀ դրամին համարժեք 12.000 ԱՄՆ դոլար կաշառք։ Պահանջված գումարի մի մասը՝ 2.389.400 ՀՀ դրամին համարժեք 5.000 ԱՄՆ դոլարը, ստացել է անձամբ՝ 2016թ.-ի հունիսի 1-ի երեկոյան, իր անձնական օգտագործման «Կիա Սորենտո» մակնիշի ավտոմեքենայի մեջ։
Ձեռք բերված ապացույցների համակցությամբ՝ Շ.Ավետիսյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով։ Քննիչը միջնորդությունը ներկայացրել դատարան՝ նրա նկատմամբ որպես խափանման միջոց կալանավորումը կիրառելու վերաբերյալ, ինչը բավարարվել է։
Նախաքննությունը շարունակվում է:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորություննապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
Հետևեք մեզ նաև Telegram-ում