Հայաստանում առողջապահական ծախսերի վրա ֆինանսական ներդրման ցուցանիշները բավականին ցածր են. Ծաղիկ Վարդանյան

Ոչ վարակիչ հիվանդությունների զարգացումը կանխելի է, եթե լուրջ եւ համապարփակ պայքար մղվի ռիսկային գործոնների դեմ: «Արմենպրես»-ի հաղորդմամբ՝ այս մասին այսօր լրագրողների հետ զրույցում նշեց ՀՀ առողջապահության նախարարության աշխատակազմի բժշկական օգնության քաղաքականությոն վարչության պետ Ծաղիկ Վարդանյանը:

Նրա խոսքով՝ առաջին 4 ոչ վարակիչ հիվանդությունները, որոնք գրանցում են մահացության եւ հիվանդացության առավելագույն ցուցանիշը, շաքարային դիաբետը, նորագոյացությունները, թոքերի օբստրուկտիվ եւ սիրտ-անոթային համակարգի հետ կապված հիվանդություններն են:

«Ոչ վարակիչ հիվանդությունների հետ կապված խնդիրները լուրջ մարտահրավեր են ոչ միայն առողջապահության, այլեւ երկրի բարեկեցիկ ապրելակերպի, երկրի տնտեսական եւ սոցիալական զարգացման համար: Ոչ վարակիչ հիվանդությունները ուղիղ կապված են տնտեսական աճի հետ, յուրաքանչյուր 10 % ոչ վարակիչ հիվանդությունների մահացության ցուցանիշի բարձրացումը 0.5 %-ով իջեցնում է տնտեսական աճը»,-ասաց նա:

Նրա խոսքով՝ այժմ գերխնդիր է միջոլորտային համագործակցությունը, որի միջոցով միայն կարելի է հասնել դրական արդյունքի:

Ծաղիկ Վարդանյանը տեղեկացրեց, որ այժմ Հայաստանը ներգրավված է Առողջապահության համաշխարհային կազմակերպության «Սթեփս» հետազոտություն իրականացվող երկրների ցանկում: Հետազոտության իրականացումը դեռ նախապատրաստական փուլում է, այն ներառելու է ազգաբնակչության մոտ 3 000 չափահաս մարդկանց ամբողջ ՀՀ մասշտաբով: Այն իրականացվելու է 3 փուլով՝ ռիսկի վարքագծային գործոններ, ֆիզիկական հետազոտություն, լաբորատոր-գործիքային հետազոտություն, որոնց արդյունքները ներկայացվելու են դեկտեմբեր ամսին:

«Ծրագիրը կարեւորվում է նրանով, որ ոչ վարակիչ հիվանդությունների կանխարգելման, բուժման ռազմավարություն իրականացնելիս ճիշտ թիրախներ ընտրելու, բնակչության համապատասխան խնդիրները որոշելու համար առաջին հերթին անհրաժեշտ է իմանալ, թե որոնք են այդ ռիսկի գործոնները, ինչ ձեւով եւ քանակով են ազդում մեր բնակչության վրա»,-ընդգծեց նա:

Անդրադառնալով առողջապահական ծախսերի վրա ֆինանսական ներդրման հայաստանյան ցուցանիշներին՝ վարչության պետն ընդգծեց, որ երկրների ընդհանուր ցանկում Հայաստանին զիջում են միայն Վրաստանը, Ադրբեջանը եւ Տաջիկստանը:

«Հայաստանում առողջապահության ծախսերը կազմում են համախառն ներքին արդյունքի ընդամենը 1.9 %-ը, իսկ ընդհանուր ծախսերի 7.9 %-ն է, ինչը բավականին համեստ ցուցանիշ է»,- եզրափակեց Ծաղիկ Վարդանյանը: