Այսօր կառավարությունը սահմանեց հայկական կոնյակի ու բրենդիի գինենյութի, սպիրտահումքի, սպիրտաջրի, բուրավետ ջրի և խաղողի օղու գինենյութի ու թորվածքահումքի թորման համար նախատեսված պարբերական կամ անընդհատ գործողության թորման սարքերին ներկայացվող տեխնիկական պահանջները:
Որոշման ընդունումը պայմանավորված է «Խաղողի հումքով ոգելից խմիչքների մասին» ՀՀ օրենքի կիրարկումն ապահովող միջոցառումների ցանկի պահանջը կատարելու անհրաժեշտությամբ: Օրենքի պահանջով ՀՀ կառավարությունը պետք է սահմանի հայկական կոնյակի ու բրենդիի գինենյութի, սպիրտահումքի, սպիրտաջրի, բուրավետ ջրի և խաղողի օղու գինենյութի ու թորվածքահումքի թորման համար նախատեսված սարքերին ներկայացվող տեխնիկական պահանջները, որոնք որևէ իրավական ակտով դեռևս սահմանված չեն:
Գինեգործական արտադրանքը, մասնավորապես կոնյակն ու կոնյակի սպիրտը, Հայաստանից արտահանվող հիմնական արտադրատեսակներից են և ունեն ծավալային աճի մեծ ներուժ: Բացի այդ, Հայաստանի արտահանմանն ուղղված արդյունաբերական քաղաքականության ռազմավարությամբ կոնյակագործությունն ընդգրկվել է առաջնային ոլորտների շարքում: Այդ պատճառով անհրաժեշտ է ոլորտը կանոնակարգող ՀՀ օրենսդրությունն ու թողարկվող արտադրանքի ցուցանիշները համապատասխանեցնել միջազգային ընդունված պահանջներին:
Որոշման ընդունմամբ ակնկալվում է բարձրացնել թողարկվող հայկական կոնյակի, բրենդիի և խաղողի օղու արտադրանքի որակական ցուցանիշները, որը հնարավորություն կտա ավելացնելու դրանց արտահանման ծավալները:
Հիշեցնենք, որ հունիսի 23-ին կառավարությունը խաղաղագործության և գինենգործության ոլորտում միասնական քաղաքականության իրականացման, առհասարակ, ոլորտի զարգացման նպատակով որոշում ընդունեց խաղողագործության և գինենործության հիմնադրամ ստեղծելու մասին:
Հայկական գինեգործությունը ունենալով զարգացման մեծ ներուժ, համակարգված քաղաքականության շնորհիվ կարող է հաջողությամբ հանդես գալ աշխարհի ամենախսապահանջ շուկաներում և ապահովելով արտահանման պատշաճ ծավալներ էականորեն ազդել երկրի տնտեսական ցուցանիշների վրա:
