Հայոց ցեղասպանության ժխտումը պատժելու առումով շատ կարևոր փուլում ենք. Ֆիլիպ Կալտենբախ
![Հայոց ցեղասպանության ժխտումը պատժելու առումով շատ կարևոր փուլում ենք. Ֆիլիպ Կալտենբախ](https://times.am/v3/wp-content/uploads/2016/10/79221b07921742d99ff0a312bcf41f3c.jpg)
Նմանատիպ
Ֆրանսիայի Սենատում սոցիալիստական կուսակցության ներկայացուցիչ Ֆիլիպ Կալտենբախը «Հավասարության և քաղաքացիության» մասին օրենքում կատարած փոփոխությունների առիթով շնորհավորել է գործընկերներին:
Ինչպես հաղորդում է «Արմենպրես»-ը` վկայակոչելով Nouvelles d’Armenie-ն, ֆրանսիացի սենատորը շեշտել է, որ ցեղասպանությունների, մարդկության դեմ և պատերազմական հանցագործությունների ժխտումը քրեականացնող օրինագիծն ընդունվել է սենատորների մեծամասնության կողմից բազմաթիվ քաղաքական բախումներից հետո:
«Այսուհետ պատժամիջոցներն առնչվում են բոլոր ցեղասպանություններին: Ժխտողականությունը, և մասնավորապես 1915թ-ի Հայոց ցեղասպանության ժխտումը, պատժելու առումով շատ կարևոր փուլում ենք: Ի հակադրություն Եվրոպայում առաջ շարժվող ծայրահեղականության, ի հակադրություն Մերձավոր Արևելքում կամ այլուր տեղի ունեցող անտանելի զանգվածային հանցագործությունների` կենսական նշանակություն ունի, որ Ֆրանսիան հստակ ուղերձով հանդես գա: Մենք դա անում ենք այս քվեարկությամբ: Մենք այլևս չենք կարող հանդուրժել ժխտողականությունը մեր երկրում ոչ մի դրսևորմամբ, ? ?անի որ ինչպես ասել է Էլի Վեյզելը, ժխտողականությունը զոհերին երկրորդ անգամ սպանելն է»,- ընդգծել է սոցիալիստ սենատորը:
Ֆրանսիայի Սենատը հոկտեմբերի 14-ին կայացած քննարկման և քվեարկության արդյունքում ընդունել է, ի թիվս մարդկության դեմ գործած այլ հանցագործությունների, Հայոց ցեղասպանության ժխտումը քրեականացնող օրինագիծը: Օրինագծին կողմ է քվեարկել 156, դեմ` 146 պատգամավոր:
Ֆրանսիայի խորհրդարանի ստորին պալատի՝ Ազգային ժողովի պատգամավորները, հուլիսին միաձայն կողմ են քվեարկել «Հավասարություն և քաղաքացիության» օրենքում փոփոխություններին, որոնք պատիժ են սահմանում մարդկության դեմ գործած բոլոր հանցագործությունները, այդ թվում` Հայոց ցեղասպանությունը ժխտելու և հերքելու համար:
Օրինագծում փոփոխությունները հնարավոր է վիճարկել Ֆրանսիայի Սահմանադրական խորհրդում, եթե համապատասխան դիմում տակ ստորագրեն Ֆրանսիայի խորհրդարանի 60 պատգամավորներ:
Հետևեք մեզ նաև Telegram-ում