Ժողովրդագրական խնդիրներն ու առաջարկվող լուծումները
![Ժողովրդագրական խնդիրներն ու առաջարկվող լուծումները](https://times.am/v3/wp-content/uploads/2016/10/96d20c026bfa72d5c580e70076e25cb9.jpg)
Նմանատիպ
Գաղտնիք չէ, որ Հայաստանում գոյացած ժողովրդագրական հիմնախնդիրներն ու ընդհանուր միտումները, ինչպես, օրինակ, ծննդի, մահացության, բնակչության բնական աճի ոլորտներում խնդիրները գնալով խորանում են ու լուրջ մտահոգման տեղիք են տալիս:
Փաստ է, որ 1992թ. մինչև օրս Հայաստանում բնակչության ընդհանուր և ծննդի մակարդակի վրա մեծ հետք են թողել բնակչության տարիքային կազմում տեղի ունեցող տեղաշարժերը: Դա բնակչության «ծերության» հանգեցնող և սոցիալ-տնտեսական նոր պայմանների հետևանք է: Վերջին տարիներին բնակչության արտագաղթի հետևանքով նվազեց ոչ միայն ընդհանուր բնակչությունը, այլև փոխվեցին նրա սեռատարիքային կազմը, ծննդի ու մահվան ընդհանուր չափերը, բնակչությունը ծերացավ:
Նշված խնդիրները ուղղակիորեն առնչվում են երկրի ապագա բարեկեցության ու անվտանգության հետ:
Այդ իսկ պատճառով կարևոր է դրանց հաղթահարման հայեցակարգային մոտեցումը, արդյունավետ ու նպատակային միջոցների ճիշտ ընտրությունը:
Կառավարության նիստին քննարկվեց պատգամավորներ՝ Հեղինե Բիշարյանի, Մհեր Շահգելդյանի և Հովհաննես Մարգարյանի կողմից ներկայացված «Նորաստեղծ ընտանիքներին միանվագ դրամական օգնություն տրամադրելու մասին» օրենսդրական նախաձեռնության վերաբերյալ կառավարության եզրակացությունը:
Պատգամավորները առաջարկում են նորաստեղծ ընտանիքներին տրամադրել միանվագ դրամական օգնության, որի նվազագույն չափը չի կարող պակաս լինել, քան 300.000 դրամից:
Օրենսդրական նախաձեռնությանը կառավարությունը տվեց բացասական եզրակացություն, հիմնավորելով նախագծում տեղ գտած մի շարք թերություններով, կարգավորման մեխանիզմների, ինչպես նաև բյուջեով համապատասխան հատկացումների բացակայության հանգամանքով:
Թեպետ նախագծով առաջարկվող կարգավորումը ուղղված է ընտանիքի ինստիտուտի օժանդակման, ինչ՞ու ոչ՝ նաև խրախուսման, այդպիսով ծնելիության ցուցանիշի բարձրացմանը, այնուամենայնիվ պետք է ընդունենք, որ ընտանիքի և երեխայի պաշտպանության հարցում միանվագ դրամական աջակցման մեխանիզմը արդյունավետ չէ: Անհրաժեշտ են ընտանիքի, մայրության, մանկության պաշտպանության առավել կայուն, հետևաբար՝ ավելի արդյունավետ միջոցների կիրառում: Միանվագ օգնությունը տեղին ու ցանկալի է, բայց չ՞է որ այս հարցում անհրաժեշտ է համակարգված աջակցություն, որը կարող է լինել, ոչ թե միանվագ ֆինանսական աջակցության, այլ որոշ արտոնությունների սահմանման ձևով:
Քաղաքակիրթ աշխարհում ընդունված է նորաստեղծ բիզնեսին հարկերի ազատման, կամ որոշ արտոնությունների սահմանման պրակտիկան: Ինչ՞ու նման մոտեցում չկիրառել ընտանիքի, ծնված երեխայի պարագայում: Օրինակ՝ ծնողի աշխատավարձից պահվող եկամտային հարկից ամեն երեխայի համար սահմանել որոշակի տոկոսի չափով նվազեցում: Այդ տոկոսը, կամ գործակցի չափը, իհարկե, մասնագիտական հաշվարկի կարիք ունի: Արդյունքում, երիտասարդը ծնող դառնալով և իր ընտանեկան բյուջեում ծախսերի մասը ավելացնելով, նաև կունենա այն «նվազեցնելու» հնարավորություն: Իհարկե այդ գումարը ավելիշատ սիմվոլիկ բնույթ կկրի, բայց այնուամենայնիվ այդ խնայումը կլինի սիստեմատիկ և ընտանեկան բյուջեի համար կանխատեսելի:
Հետևեք մեզ նաև Telegram-ում