Գերմանացիների մեծամասնությունը դժգոհ է ԵՄ-ի քաղաքականությունից. TNS Infratest Politikforschung

Գերմանացիների մեծամասնությունն այն կարծիքին է, որ Եվրամիությունը ճիշտ ճանապարհով չի ընթանում, մասնավորապես, այն հարցում, ինչը վերաբերում է Brexit-ի հետ կապված իրադրությանը: Այդ մասին, ինչպես տեղեկացնում է «Արմենպրես»-ը, վկայում են հասարակական կարծիքի հարցման արդյունքները, որը TNS Infratest Politikforschun g հետազոտական կենտրոնի կողմից անցկացվել է KՓrber-Stiftung հիմնադրամի պատվերով:

«Brexit, միգրացիոն ճգնաժամ, անդրատլանտյան օտարացում՝ բազմաթիվ մարտահրավերներ, որոնք գերմանացիներին հարկադրում են կասկածել այն բանում, որ Եվրամիության երկրները ճիշտ որոշումներ են ընդունում: Այսպես, հարցման մասնակիցների 62 տոկոսը կարծում է, որ Եվրամիությունը ճիշտ ճանապարհով չի ընթանում»,- ասված է հիմնադրամի մամուլի ծառայության հաղորդագրության մեջ:

Հարցվածների ավելի քան երկու երրորդն (67 տոկոսը) այն կարծիքն է հայտնել, որ Brexit-ը լրջորեն խախտել է ԵՄ-ի համախմբվածությունը, հետազոտության մասնակիցների 58 տոկոսը հանդես է գալիս միավորումից Մեծ Բրիտանիայի դուրս գալու շուրջ կոշտ բանակցությունների օգտին:

ԵՄ-ից դժգոհությունը ցույց են տալիս նաեւ միության կազմում ԳՖՀ-ի առավելությունների եւ թերությունների վերաբերյալ հարցի պատասխանները: Տասը հարցվածներից միայն չորսն է (39 տոկոս) առավելապես դրական կողմեր տեսնում այն բանում, որ Գերմանիան ԵՄ-ի մաս է կազմում, կեսից պակաս մասը (48 տոկոսը) տեսնում է ինչպես առավելություններ, այնպես էլ թերություններ:

Ընդհանուր առմամբ հարցվածների 78 տոկոսը կարեւոր է համարում ընդհանուր եվրոպական արտաքին քաղաքականություն վարելը եւ դրա հետ մեկտեղ Գերմանիայի շահերը պաշտպանելը. ԵՄ-ի ներսում գերմանացիները գլխավոր գործընկեր են համարում Ֆրանսիան (80 տոկոս), Իտալիան (71 տոկոս), Նիդեռլանդները (71 տոկոս) եւ Լեհաստանը (67 տոկոս):

Հարցումն անցկացվել է 2016 թվականի հոկտեմբերին, դրան մասնակցել է 1001 մարդ, հաղորդել է ՌԻԱ Նովոստին: