ԵԽ նախագահը նույնպես շնորհավորել է Ս.Սարգսյանին՝ վերընտրվելու կապակցությամբ

Նախագահ Սերժ Սարգսյանին վերընտրվելու կապակցությամբ շնորհավորական ուղերձ է հղել Եվրոպական խորհրդի նախագահ Հերման վան Ռոմպոյը, տեղեկացնում է նախագահի գրասենյակը:

Ուղերձում, մասնավորապես, ասվում է.

«Հարգելի պարոն Նախագահ,

Որպես Եվրոպական խորհրդի նախագահ կցանկանայի Ձեզ փոխանցել շնորհավորանքներս Հայաստանի Հանրապետության նախագահի պաշտոնում Ձեր վերընտրվելու կապակցությամբ:

Ես ողջունում եմ վերջին տարիներին ձեր երկրում նախաձեռնած բարեփոխումները: Այս ուղիով շարունակական ջանքերը ձեր երկիրը կմոտեցնեն Եվրոպական Միությանը’ հնարավորություն տալով մեզ հասնելու Արևելյան գործընկերության շրջանակում քաղաքական ասոցացման և տնտեսական ինտեգրման մեր ընդհանուր նպատակին: Ես ողջունում եմ նաև Ձեր ջանքերում հավելյալ առաջընթացը’ ուղղված բարելավելու միջազգային չափանիշներին համապատասխան ընտրությունների անցկացումը’ ներառյալ ԵԱՀԿ/ԺՀՄԻԳ դիտորդական առաքելության նախանշած առկա խնդիրների լուծման ուղղությամբ:

Տեղյակ եմ ձեր երկրի բարդ տարածաշրջանային իրավիճակից: Եվրոպական Միությունն ակտիվորեն նպաստում է Հարավային Կովկասում հակամարտությունների կարգավորման ջանքերին և շարունակելու է այդպես վարվել: Կցանկանայի ևս մեկ անգամ քաջալերել Ձեզ, ինչպես քաջալերում եմ այլ առաջնորդներին, համարձակ քայլեր ձեռնարկել այս ուղղությամբ, եթե նույնիսկ դրանք ժամանակ առ ժամանակ դժվար կլինեն:

Վստահեցնում եմ Ձեզ մեր հարաբերություններն այսուհետ ևս խորացնելու իմ հանձնառությունը»։

Սերժ Սարգսյանին վերընտրվելու կապակցությամբ շնորհավորական ուղերձներ և բարեմաղթանքներ են հղել նաև Բրազիլիայի Դաշնային Հանրապետության նախագահ Դիլմա Ռուսեֆը, Մոլդովայի Հանրապետության նախագահ Նիկոլայ Տիմոֆտին: