Հայաստանը Վատիկանի Սուրբ Աթոռում իր դեսպանատունը կունենա

Հայաստանը Վատիկանի Սուրբ Աթոռում իր դեսպանատունը կհիմնի: ՀՀ կառավարությունն այսօրվա նիստում հավանություն տվեց «Սուրբ Աթոռում Հայաստանի Հանրապետության դեսպանություն ստեղծելու մասին» Հայաստանի Հանրապետության Նախագահի հրամանագրի նախագծին:

Սուրբ Աթոռի հետ հարաբերությունների խորացումը կարևորվում է ոչ միայն աշխարհում վերջինիս ունեցած հոգևոր, այլև՝ քաղաքական ազդեցությամբ։ Սուրբ Աթոռը հանդիսանում է մշտական դիտորդ ՄԱԿ-ում և ԵԽ-ում, ինչպես նաև անդամակցում է ԵԱՀԿ-ին և մի շարք այլ միջազգային կազմակերպությունների։ Սուրբ Աթոռում դեսպանության հիմնումը կարևորվում է նրանով, որ երկկողմ հարաբերություններն ու համագործակցությունը նոր լիցք կստանան և կբարձրանան որակական նոր մակարդակի։

ՀՀ արտաքին գործերի նախարարության հիմնավորման համաձայն՝ դեսպանության հիմնումը առավել համակարգված և ուղղորդված կդարձնի երկկողմ աշխատանքները, ինչպես նաև կարող է նպաստել աշխարհում հայկական մշակութային աժեքների պահպանության գործում Սուրբ Աթոռի մասնակցության ակտիվացմանը։

Հայաստանի և Սուրբ Աթոռի միջև դիվանագիտական հարաբերությունները հաստատվել են 1992թ. մայիսի 23-ին։ 1988թ. ավերիչ երկրաշարժից հետո Սուրբ Աթոռը Հայաստանին ցուցաբերել է մարդասիրական օգնություն՝ նվիրաբերելով Հայաստանի Աշոցքի շրջանում կառուցված «Տիրամայր Նարեկի» հիվանդանոցը: Սուրբ Աթոռը 2000թ. նոյեմբերի 9-ին ճանաչել է Հայոց Ցեղասպանությունը՝ Վատիկանում Հռոմի Պապ Հովհաննես-Պողոս Բ-ի և Գարեգին Բ Ամենայն Հայոց Կաթողիկոսի միջև ստորագրված համատեղ հայտարարությամբ։ Տարիների ընթացքում երկկողմ հարաբերությունները շարունակական զարգացում են ապրել։ Հայկական կողմից տեղի են ունեցել մի շարք բարձրաստիճան այցելություններ Նախագահի, վարչապետի, ԱԳ նախարարի մակարդակով։