Այսօր ՀՀ Փաստաբանների պալատում կայացել է պալատի խորհրդի ընդլայնված նիստը: Նիստի ժամանակ թեժ քննարկում է ծավալվել պալատի անդամ Հայկ Ալումյանի կողմից նախաձեռնվող «դատադուլ» խորագրով գործադուլ կազմակերպելու շուրջ:
Բարձրացվել են մի շարք հարցեր, ինչպես օրինակ՝ թե որքանով է նպատակահարմար գործադուլ սկսել հետընտրկան այս շրջանում, երբ դեռ տեղի չի ունեցել նախագահի երդմնակալության արարողությունը, և այդ ցույցը կարող է քաղաքական ենթատեքստ ստանալ:
Հ.Ալումյանից հետաքրքրվել են նաև, թե ինչու է ցանկանում այժմ ակտիվացնել բողոքը, քանզի նախապես որոշված էր, որ այս հարցին կրկին անդրադառնալու են սեպտեմբերին: Նաև խոսվել է այն մասին, որ դատական համակարգում բարեփոխումներ են իրականացվում, և ինչու չսպասել դրանց ավարտին այն չբավարարվելու դեպքում միայն բողոքել:
Այս բոլոր հարցերին լիարժեք պատասխան չի կարողացել տալ գործադուլի շարժման համակարգող խմբի անդամ Հ.Ալումյանը: Նիստի մասնակիցների մեծամասնությունը դեմ է եղել գործադուլին, և զգուշացվել է, որ բողոքի ակցիաներ իրականացնելու դեպքում պետք է հանդես գալ անհատապես և չներկյանալ Փաստաբանների պալատի անունից:
