ԲՀԿ պատգամավոր Տիգրան Ուրիխանյանը հայտարարություն էր տարածել, ըստ որի’ հերթական քառօրյայի երրորդ օրը կանոնակարգով նախատեսված մեկուկես ժամվա ընթացքում իրեն հնարավորություն չի տրվել հարց ուղղել ՀՀ վարչապետին:
«Քաղաքական մեծամասնության ներկայացուցիչները հերթական անգամ իրենց՝ իբրև նախօրոք տրված գրավոր հարցերն ու պատասխանները որոշեցին վերարտադրել դահլիճում, ինչի պատճառով վատնվեց ժամանակի զգալի մասն ու հարցս հնչեցնելու համար հերթ չհասավ»,-այս մասին հայտնել է Տ. Ուրիխանյանը:
Նշենք, որ Ուրիխանյանի հարցը վերաբերվում էր «Նաիրիտ» գործարանին:
Ի պատասխան Ուրիխանյանին, ՀՀ Ազգային ժողովի նախագահի տեղակալ, ՀՀԿ-ական Էդուարդ Շարմազանովը խորհուրդ տվեց գրավոր դիմել կառավարությանը և ստանալ իր հարցի պատասխանը:
«Տիգրան Ուրիխանյանը մեկ տարի է արդեն աշխատում է պառլամենտում: Նա պիտի շատ լավ հասկանա ԱԺ կանոնակարգ օրենքի պահանջները: Ոչ միայն իրեն չի տրվել հարց տալու հնարավորություն, այլ բազմաթիվ հանրապետական պատգամավորների: ԱԺ կանոնակարգ օրենքով առաջին երեք հարցերի իրավունքը պատկանում է ընդդիմադիր պատգամավորներին: Մենք պետք է հնարավորություն տանք, որպեսզի առաջինը ընդդիմությունը տա իր հարցերը կառավարությանը»-նշեց Է. Շարմազանովը:
