Ամենայն Հայոց Կաթողիկոսն ընդունել է կաթոլիկ ուխտավորների
Նմանատիպ
Ապրիլի 5-ին Մայր Աթոռ Սուրբ Էջմիածնում Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունեց Ֆրանսիայի Մոմպելիե քաղաքից Հայաստան ժամանած կաթոլիկ ուխտավորների’ առաջնորդությամբ Հայր Քրիստիան Դամեռոնի: Այս մասին տեղեկացնում են Մայր Աթոռ Սուրբ Էջմիածնի տեղեկատվական կենտրոնից:
Հանդիպման սկզբում Հայր Դամեռոնն ուրախություն հայտնեց Սուրբ Էջմիածնում գտնվելու կապակցությամբ, ապա տեղեկացրեց, որ խումբն այցելել է Հայաստան` Հայ Եկեղեցուն ու հայկական մշակույթին ավելի մոտիկից ծանոթանալու նպատակով:
Այնուհետև կաթոլիկ ուխտավորներին իր օրհնությունը բերեց Վեհափառ Հայրապետը’ ողջունելով Քույր Եկեղեցու հավատավոր զավակների այցը Հայաստան: Նորին Սրբությունն ուխտավորներին համառոտ ներկայացրեց Հայ Եկեղեցու պատմությունը’ ընդգծելով, որ Հայոց Եկեղեցին, հակառակ պատմության ընթացքում կրած բազմաթիվ դժվարություններին ու խոչընդոտներին, այսօր էլ շարունակում է իր ծառայությունը բերել հավատավոր հայ ժողովրդին:
Զրույցի ընթացքում Նորին Սրբությունն անդրադարձավ նաև կրթադաստիարակչական և սոցիալական ոլորտներում Եկեղեցու կողմից կատարվող աշխատանքներին, ինչպես նաև Հայ Առաքելական և Հռոմի Կաթոլիկ Եկեղեցիների ջերմ հարաբերություններին ու համագործակցությանը:
Հետևեք մեզ նաև Telegram-ում