Հայ ժամանակակից աբստրակտ արվեստը «Զվարթնոց» օդանավակայանում

Երևանի «Զվարթնոց» օդանավակայանի Մեկնումներ և VIP սրահներում հոկտեմբերի 2-18-ը գործում է նկարիչ Կարեն Մկրտչյանի անհատական ցուցահանդես-վաճառք, որտեղ ներկայացված են արվեստագետի՝ տարբեր ժամանակաշրջանների կտավներ: Այս մասին տեղեկացնում է Panorama.am-ը։

Ցուցահանդեսը կազմակերպվել է art.am ծրագրի շրջանակներում:

Ըստ նկարչի` իր գործերն արտահայտում են. «Իրականության և երևույթների վերաիմաստավորում-խմբագրում` ձերբազատված մակերեսի տեսանելին նկարագրելու պարտադրանքից, տրանսֆորմացնելով և փոխաբերելով ճանաչելի և շոշափելի ձևերը` տալով նրանց նոր հանդերձ ու նկարագիր, և այդ բոլորը անցկացնելով զգայականի և ենթագիտակցականի թանձր խառնարանով` արդյունքում թողնելով միայն ներքին պրիզմայից ելնող անդրադարձերը»:

Կարեն Մկրտչյանը ծնվել է 1958թ.-ին Շիրակի մարզի Արթիկ քաղաքում: 1979թ-ին ավարտել է հայկական մանկավարժական ինստիտուտի գեղարվեստի բաժինը: 1996թ-ից հանդիսանում է Հայաստանի նկարիչների միության, իսկ 2003թ-ից «Կերպար» նկարիչների ընկերակցության անդամ:

Կազմակերպիչների տեղեկացմամբ, 1979թ-ից մինչ օրս Կարեն Մկրտչյանի աշխատանքները ցուցադրվել են Հայաստանում, Ֆրանսիայում, Միացյալ Արաբական Էմիրություններում, Ուկրաինայում, Ռուսաստանում և մի շարք այլ երկրներում: