Խաչատրյանի փառատոն. Դեյվիդ Նեբելի մեկնաբանությամբ կհնչի Բեթհովենի Ջութակի կոնցերտը

Նոյեմբերի 9-ին Խաչատրյանի 5-րդ միջազգային փառատոնի շրջանակներում ելույթ կունենա մեծ ճանաչում ունեցող ջութակահար Դեյվիդ Նեբելը (Շվեյցարիա)։ Այս մասին տեղեկացնում է Aysor.am-ը։

Նա Հայաստանի պետական երիտասարդական նվագախմբի հետ կներկայացնի Լյուդվիգ վան Բեթհովենի Ջութակի կոնցերտը։ Բեթհովենի Ջութակի կոնցերտը համարվում է եվրոպական դասական երաժշտության լավագույն ստեղծագործություններից մեկը։ Այն առանձնանում է ասելիքի խորությամբ, քնարականությամբ և հոգու խորքերը թափանցող ուժով։ Հայ հանդիսատեսը Բեթհովենի Ջութակի կոնցերտի՝ Դեյվիդ Նեբելի մեկնաբանությունը կարող է ունկնդրել խաչատրյանական փառատոնի շրջանակում։

Նշենք, որ Դեյվիդ Նեբելին երաժշտական քննադատները նկատել են շատ վաղուց, երբ վերջինս դեռ 9 տարեկանում ունեցել է իր առաջին համերգը։ «Պատանի ջութակահար՝ խոստումնալից հեռանկարներով». այսպիսին էր Neue Zürcher Zeitung-ի նյութի վերնագիրը Camerata Zürich-ի հետ Նեբելի առաջին համերգի մասին: Որպես մենակատար ջութակահարը հանդես է եկել բազմաթիվ հայտնի համերգասրահներում և ճանաչված նվագախմբերի հետ:

Նոյեմբերի 9-ի համերգային երեկոյի ընթացքում Հայաստանի պետական երիտասարդական նվագախումբը դիրիժոր Սերգեյ Սմբատյանի ղեկավարությամբ կկատարի նաև Պյոտր Չայկովսկու թիվ 6 սիմֆոնիան։

Հիշեցնենք, որ Խաչատրյանի միջազգային փառատոնն անցկացվում է ՀՀ Նախագահի հովանու ներքո։ Երաժշտական այս տոնը կյանքի է կոչում Հայաստանի պետական երիտասարդական նվագախումբը (գլխավոր գործընկեր՝ ՎիվաՍելլ-ՄՏՍ)՝ ՀՀ մշակույթի նախարարության, «Խաչատրյան» և Մշակույթի աջակցության եվրոպական հիմնադրամների աջակցությամբ։