«Շնորհակալությո′ւն, հայ զինվոր» համերգի հասույթը կտրամադրվի զինվորների վերականգնողական նոր կենտրոնի կառուցմանը

Մշակույթի նախարարության և «Դիրքապահ» հասարակական կազմակերպության նախաձեռնությամբ հունվարի 24-ին, ժամը 19:00-ին Արամ Խաչատրյան համերգասրահում տեղի կունենա «Շնորհակալությո′ւն, հայ զինվոր» բարեգործական համերգը՝ Քառօրյա պատերազմի մասնակիցներին բարոյապես և ֆինանսապես աջակցելու նպատակով. համերգի տոմսերի ողջ հասույթը կփոխանցվի վերականգնողական նոր կենտրոնի կառուցմանը։ Այս մասին տեղեկացնում է Panorama.am-ը։

Մշակույթի նախարարության հաղորդմամբ, համերգին ներկա կլինեն հայրենիքի պաշտպանության համար ծանր վիրավորում ստացած տղաները։ Ապրիլյան քառօրյա պատերազմի մասնակիցների «Դիրքապահ» հասարակական կազմակերպության ղեկավարների մեջ ևս կան հայրենիքի պաշտպանության ժամանակ ծանր վիրավորվածներ, որոնք անձամբ են մասնակցում այս ծրագրի իրականացմանը։

Մշակույթի նախարար Արմեն Ամիրյանը և խորհրդական Արսեն Գրիգորյանը դեկտեմբերի սկզբին «Դիրքապահ» միավորման նախագահ Մանուէլ Մանուկյանի ուղեկցությամբ այցելել են Ապրիլյան քառօրյա պատերազմի այն մասնակիցներին, որոնք առողջության վերականգնողական փուլում են։

«Բոլորիս երախտիքը նրանց փոխանցելու ևս մեկ հնարավորություն է՝ «Շնորհակալություն, հայ զինվոր» համերգին մասնակցելը։ Տոմսերը վաճառվում են»,-հայտնում են նախարարությունից: