«Մանչեսթեր Սիթին» իր պաշտոնական կայքի միջոցով հայտարարել է կիսապաշտպան Կևին Դե Բրյունեի հետ նոր պայմանագիր կնքելու մասին:
Բելգիացու նոր համաձայնագիրը նախատեսված է մինչև 2023 թվականի ամառը: 26-ամյա ֆուտբոլիստի տարեկան աշխատավարձը կազմելու է 15,3 միլիոն եվրո: Նրա նախորդ համաձայնագրի ժամկետն ավարտվելու էր 2021 թվականին:
«Շատ ուրախ եմ, որ նոր պայմանագիր ստորագրեցի: Միշտ ցանկացել եմ մնալ «Մանչեսթեր Սիթիում»: Առաջին օրվանից ինձ այստեղ ինչպես տանն եմ զգում: Մենք ոչ միայն հաղթում ենք, այլ դա անում ենք գեղեցիկ ֆուտբոլ ցուցադրելով: Մեծ հույսերով եմ նայում ապագային»,- ասել է Դե Բրյունեն:
Հիշեցնենք, որ բելգիացին «քաղաքայինների» կազմում է հանդես գալիս 2015 թվականից: Անգլիայի ընթացիկ առաջնության 24 խաղում կիսապաշտպանը 6 գոլ է խփել ու 10 գոլային փոխանցում կատարել:
