«Եթե բոլորը» ֆիլմը Պեկինի 3-րդ միջազգային փառատոնին մրցանակ է ստացել

Ապրիլի 16-23-ը Չինաստանի մայրաքաղաքում կայացավ Պեկինի 3-րդ միջազգային կինոփառատոնը: Այս մասին տեղեկացնում են ՀՀ ԱԳՆ մամուլի, տեղեկատվության եւ հասարակայնության հետ կապերի վարչությունից:

Մրցութային ծրագրում ներկայացված շուրջ 60 երկրի ավելի քան 500 ֆիլմերից մրցանակաբաշխության վերջնական փուլ անցան 11 երկրի արտադրության 15 ժապավեններ, որոնց թվում էր նաև հայկական կինոարվեստը ներկայացնող «Եթե բոլորը» գեղարվեստական լիամետրաժ կինոնկարը: Արցախյան պատերազմի և դրա հետևանքների մասին պատմող այս ֆիլմը նկարահանվել է Հայաստանի անկախության և Հայոց բանակի կազմավորման 20-ամյակի առիթով՝ ՀՀ նախագահ Սերժ Սարգսյանի բարձր հովանու ներքո: Ֆիլմի ռեժիսորն է Նատալյա Բելյաուսկենեն, պրոդյուսերները’ Միքայել Պողոսյանը և Թերեզա Վարժապետյանը:

ՉԺՀ-ում ՀՀ դեսպանության աջակցությամբ և հովանավորությամբ կինոփառատոնին ներկայացված այս ֆիլմը ապրիլի 17-ին և 18-ին ցուցադրվեց Պեկինի երկու կինոթատրոններում՝ արժանանալով հանդիսատեսի ջերմ ընդունելությանը:

Ապրիլի 23-ին տեղի ունեցավ կինոփառատոնի մրցանակաբաշխության արարողությունը, որին հրավիրված էր նաև ՉԺՀ-ում ՀՀ դեսպան Արմեն Սարգսյանը: «Եթե բոլորը» ֆիլմը հաղթող ճանաչվեց երկու անվանակարգերում. «Լավագույն երաժշտություն» մրցանակին արժանացավ կոմպոզիտոր Վահագն Հայրապետյանի կողմից գրված ֆիլմի երաժշտությունը, իսկ «Երկրորդ պլանի լավագույն դերակատար» մրցանակը շնորհվեց անվանի դերասան Վահագն Սիմոնյանին: